Futbollisti i Napolit me origjinë shqiptare, Elseid Hysaj, ka dhënë një intervistë për gazetën ‘Il Mattino’. 21-vjeçari foli për prejardhjen e tij, ëndrrat dhe karrierën. ‘Il Mattino’ bën një biografi të shkurtër për Hysajn, duke nisur me fëmijërinë e tij të kaluar në rrugicat e qytetit të Shkodrës.
“Vogëlushi Elseid ngrihej në mëngjes për të luajtur në një cep të rrugës, në Shkodër, qytet që ndodhet në veri të Shqipërisë. Elseid ëndërronte futbollin. Luante dhe më pas ndihmonte nënën e tij Shpresa dhe tre motrat, ndërkohë që babai në vitin 1996, u nis drejt Italisë me gomonen dhe Elseidi ishte vetëm 2 vjeç. Prej 14 vjetësh ai qëndroi larg të atit dhe kjo e ka bërë që të ndihet i fortë. Ai thotë se nuk ka kurrë frikë. Kështu nis historia e futbollistit shqiptar që luan për Napolin”, shkruhet në artikull.
Këtu nis historia e futbollistit më të ri shqiptar tek Napoli
Një histori? Është një përrallë e vërtetë. Unë jam i ndërgjegjshëm se ajo që më ndodhi mua, mund t’i ndodhë vetëm një në një milionë. Ata që vinë këtu me anije, e bëjnë nga uria. Është e njëjta gjë që ka ndodhur edhe me ne gjatë viteve ’90.
Hysaj, të rritesh në Shqipëri, të bën më të fortë?
Bëhesh më i fortë duke njohur sakrificat e tim ati, ndërkohë që ata që jetonin rreth meje vuanin. Bëhesh më i fortë, duke sfiduar vdekjen nëpërmjet Adriatikut, ku shqiptarët udhëtonin me një gomone që mbante vetëm 10 persona, por brenda saj ndodheshin 30 të dëshpëruar, pranë njëri-tjetrit dhe dallgët që ngriheshin 6-7 metra. Bëhesh më i fortë duke ditur se shumë prej tyre nuk ia dolën mbanë.
Kështu erdhi babai yt në Itali?
E ka bërë tre herë atë udhëtim nga Shqipëria drejt Italisë. Dy herë është kthyer pas sepse ndjente mungesën e familjes dhe tokës së tij. Më pas nisi që të punonte në ndërtim dhe hapi një kompani të vogël të ndërtimi.
Po tani?
Prej krizës iu desh që ta mbyllte pas 20 vitesh. Tani kjo nuk më intereson sepse mendoj unë për babanë tim. Ai mund të rrijë i qetë e të shohë ndeshjet e mia; e meriton.
