Neymar ishte i detyruar të ndiqte nga tribuna eliminimin surprizë të skuadrës së tij Paris Saint-Germain, mbrëmjen e të mërkurës ndaj Manchester United në Champions League.
Jashtë fushave që nga janari për shkak të një dëmtimi në këmbë, ylli Brazilian ishte i pamundur të ndihmonte skuadrën e tij në disfatën në shtëpinë e PSG me rezultatin 1-3 përballë “Djajve të Kuq”.
Një ndeshje e vendosur në minutat shtesë, falë një penalltie të dyshimtë të akorduar për prekje të topit me dorë në zonë, e shndërruar më pas në gol nga Rashford në të 94’.
Fytyra e zhgënjyer e po aq e irrituar e Neymar në momentin e golit të eliminimit ka bërë xhiron e botës përmes rrjeteve sociale, sikurse ka bërë edhe postimi i tij në “Instagram”.
“Kjo është e turpshme! Dhe UEFA sërish zgjedh katër njerëz që nuk marrin vesh fare nga futbolli për të parë vendimin e VAR në xhirim të ngadaltë… ajo prekje me dorë thjeshtë nuk ekziston! Si e prek topin me dorë pas shpine? Ahhh shkoni pirdhuni”, ishte reagimi i Neymar në rrjetet sociale.
Fjalë të rënda ato të brazilianit që mund të sjellin pasoja të konsiderueshme ndaj tij. Sipas raportimeve të “AS”, ndaj Neymar mund të merret dënimi me tre ndeshje pezullim. Mesazhi i yllit të PSG është në kundërshtim me nenin 11 të kodit disiplinor të UEFA-s, që ndalon ofendimet, ose dhunimin e rregullave bazë të mbarëvajtjes.
/telesport/a.r
