Është një natë e ethshme, para garës finale të Eurosong 2015 që po mbahet në Wiener Stadthalle në Vjenë. Elhaida Dani është në përgatitjet e fundit për paraqitjen e nesërme. Pasdite u mbajtën provat finale, ku këngëtarët performuan me veshjet e tyre ceremoniale, që do të përdoren nesër. Mediat botuan videon ku Elhaida Dani shfaqet me një veshje të errët, të derdhur deri në fund të këmbëve.
Por nuk mbaron me kaq. Pasi një grup fansash të këngëtares shqiptare i dërguan në mbrëmje redaksisë tonë, jo vetëm një set fotosh ku ajo shfaqet me veshjen rezervë (atë të nesërmen e hoqi, për të mos e dëmtuar), por na nisën edhe një prononcim të shkurtër të Elhaida Danit për lexuesit e Javanews.al
Ja çfarë i thotë këngëtarja e njohur, të gjithë shqiptarëve në këto orë emocionuese para natës finale përmes JavaNews.al:
“Jam e entusiazmuar për përkrahjen që më kanë dhënë dhe po më japin shqiptarët, por njëkohësisht ndodhem para një prove e përgjegjësie të rëndësishme. Kjo gjë më motivon fuqimisht që të bëj maksimumin tim nesër në garën finale. Nuk kam fuqi në këto momente të mendoj më tej se kaq. Dua vetëm t’ju them se konkurenca është mjaft e fortë dhe fakti që jam pjesë e kësaj finaleje, më bën të jem krenare si këngëtare dhe si shqiptare. Bashkëkombasve të mi u kam detyrim që t’i gezoj, siç ata më kanë lumturuar mua!”
Më poshtë po botojmë gjithë setin e fotove ekskluzive të marra pak minuta më parë në Wiener Stadthalle, ku ndodheshin mbi dhjetë mijë vetë, për të parë provën finale të këngëtarëve të kualifikuar në natën e nesërme.
