Kryeministri Edi Rama ka prezantuar sot në qytetin e Elbasanit kandidatin e majtë për bashkinë e këtij qyteti, dhe njëherësh kreun aktual të bashkisë Qazim Sejdini.
Edhe pse deputeti i këtij qarku nga PS Ben Blushi nuk ishte prezent, Rama vijoi me prezantimin e Sejdinit. Në fjalën e tij Rama akuzoi qeverinë e mëparshme për mungesë investimesh në Elbasan, ndërsa shtoi se nuk është marrë asnjë masë kundër ndotjes së mjedisit dhe mbetjeve.
“Elbasani u la pas dorë për shumë kohë, dhe vetëm në muajt e fundit ka nisur të ndryshojë situata. Elbasani ka vuajtur ndotjen, sepse qeveria e mëparshme në Tiranë as nuk donte t’i dinte për këtë situatë. Pas 23 qershorit janë marrë masa që të sistemohet kjo çështje, dhe po ngrihet impianti i teknologjisë së lartë për përpunimin e mbetjeve në Elbasan. Qeveria e kaluar nuk ka marrë asnjë masë kundër ndotjes në Elbasan”, tha Rama.
Nga ana e tij shefi i qeverisë premtoi investime në Elbasan, duke u shprehur se në 4 vitet e ardhshme për këtë Bashki do të zgjidhet problemi i mungesës së ujit të pijshëm.
“Për këtë qytet sot mbetet sfidë mungesa e ujit të pijshëm. Me reformën e re territoriale të gjitha bashkitë do të kenë ujësjellësin e tyre dhe nuk do të jenë të varura nga komunat. Pas zgjedhjeve do fillojmë ta jetësojmë programin. Në 4 vitet e ardhshme do ta kemi zgjidhur problemin e ujit të pijshëm për qytetin dhe gjithë Bashkinë e Elbasanit”, tha Rama.
Rama nuk kurseu as kandidatin e djathtë për Elbasanin, Ardjan Turkun kur tha se e keqja e tij më e madhe është se është me PD.
“Po le të ndalemi edhe tek kundërshtari i Sejdinit për këto zgjedhje. Morën Ardian Turkun e shkretë dhe sollën në Elbasan. S’e për çfarë erdhi, e dinë ata. Por qytetarët e Elbasanit e dinë, se e provuan njëherë. Ai s’ka asnjë të keqe në fakt si person, por e ka një të keqe të madhe se është me PD. Se kur je me PD nuk mund të bësh punë të mira, se s’të lë partia”, u shpreh Rama.
Redaksia Online
(JavaNews.al)
