I shpallur në kërkim lidhur me vrasjen e Bujar Hasanit dhe biznesmenit Paulin Gjergji, 21-vjeçari Klaudio Përkola rezulton të jetë djali i një efektivi policie në komisariatin e Kurbinit.
Përkola, është shpallur person në kërkim nga policia, por rezulton që të jetë djali i efektivit të policisë Gjovalin Përkola, i cili rezulton të jetë pjesë e organikës së komisariatit të Laçit.
Pas ngjarjes së rëndë, 21-vjeçari, prej tre ditësh është shpallur në kërkim me urdhër të prokurorisë.
Po ashtu, pas ngjarjes mësohet se babai i tij Gjovalini, po negocion me drejtuesit e policisë për të realizuar dorëzimin e djalit të tij.
Nisur nga ngjarja, paralelisht ndaj të atit të djalit, që është në kërkim ka nisur procedura për pezullimin nga detyra.
Eduart Lamaj, autori kryesor i vrasjes së biznesmenit Bujar Lika dhe Paulin Gjergjit në Laç, e kreu krimin duke i marrë mjetin një mikun të tij. Ai ia hoqi targat për të mos u identifikuar nga kamerat e sigurisë.
Pas arrestimit, në sajë edhe të dëshmisë së tij, pasditen e së martës, u sekuestrua pikërisht kjo makinë tip Golf 5 e përdorur ditën e vrasjes. Pas ngjarjes, ai i kishte mbivendosur sërish targat, ndërsa mjetin e kishte pakuar në një rrugicë në zonën e “Don Boskos”, në Tiranë.
Hetimet zbuluan se makina ishte në pronësi të Shpëtim Bodurit. Ky i fundit u mor në pyetje nga hetuesit, duke deklaruar se mjetin ja kishte lënë në përdorim mikut të tij, Eduartit.
Si bashkëpunëtorë të Lamaj, i vetmi i arrestuar deri tani, nga policia janë shpallur në kërkim 33- vjeçari Ilir Xhepaj (Likaj), 31- vjeçari Elson Alija, i njohur ndryshe si Oltion Vlashi dhe 21 vjeçari Klaudio Perkola.
/a.r
