Edhe një ditë pas arrestimit, autori i dyshuar i vrasjes së Xhuljano Bullarit vijon të këmbëngulë se ai nuk ka lidhje me krimin.
Në ditën e dytë të marrjes në pyetje nga grupi hetimor, e ka mohuar të jetë ai personi që ka qëlluar të riun nga Tirana duke e lënë të vdekur në makinë në fshatin Babicë.
‘Arma dhe rrobat nuk janë të miat, kam njohje me 25-vjeçarin po nuk e vrava. Kam qënë i përfshirë gabimisht në ngjarje’- mësohet të ketë thënë Selmanaj i cili i ka qëndruar me bindje të plotë deklaratës se ai nuk e vrau të riun.
Burimet thanë se 39-vjeçari që u arrestua në zonën e ish-Bllokut në Tiranë, po mbahet në paraburgim në Policinë e Vlorës, ku ditën e premte pritet të dalë në gjykatë për seancën e vlerësimit të masës së arrestit.
Mësohet se autori i dyshuar e ka mohuar edhe që rrobat e gjetura nga policia, për të cilat dyshohet se ai i mbante veshur ditën e krimit, të jenë të tijat.
I arrestuari, me origjinë nga Elbasani, është person me precedentë të shumtë penalë, kryesisht në fushën e vjedhjeve.
Bledar Selmanaj rezulton emër i njohur për Policinë dhe hera e fundit kur, Selmanaj u arrestua dhe u dënua ishte viti 2012.
Përkundër deklaratave mohuese të tij, për hetuesit, arma e gjetur e groposur pranë banesës së Selmanajt, e implikon direkt në vrasje.
Por do të jenë provat balistike të pistoletës, që do të zbulojnë përfundimisht nëse ajo është përdorur për të kryer ekzekutimin e 25-vjeçarit.
Nga ana e Policisë dhe Prokurorisë së Vlorës vijon puna për dokumentimin e plotë dhe vënien para përgjegjësisë ligjore të personave të tjerë që mund të jenë përfshirë në këtë ngjarje.
Materialet iu referuan Prokurorisë se Rrethit Gjyqësor Vlorë, për veprat penale “Vrasja me paramendim” dhe “Armëmbajtja pa leje”.
g.kosovari
