Policia ekuadoriane ka sekuestruar 469 kilogramë kokainë pranë kufirit me Kolumbinë, ndërsa qindra paketime të drogës mbanin fotografinë e yllit norvegjez të futbollit, Erling Haaland.
Sasia e drogës u zbulua në një kamion që po lëvizte në autostradën Pan-Amerikane, pas një informacioni të marrë nga policia. Kokaina ishte fshehur në një ndarje të modifikuar të automjetit, ku autoritetet gjetën 370 pako me lëndën narkotike.
Gjatë operacionit u arrestuan drejtuesi i kamionit dhe një grua, e identifikuar si María R., e cila kishte dokumente kolumbiane. Përdorimi i figurave të personazheve të njohur në paketimet e drogës nuk është një praktikë e panjohur për rrjetet e trafikut. Imazhe të futbollistëve apo personazheve të tjerë publikë mund të përdoren për të identifikuar ngarkesat, grupet kriminale, origjinën ose destinacionin e tyre.
Sipas autoriteteve, ngarkesa e sekuestruar vlerësohet rreth 842 mijë dollarë në tregun vendas të Ekuadorit, ndërsa vlera e saj do të arrinte në më shumë se 11 milionë dollarë në SHBA dhe rreth 19.6 milionë dollarë në Europë.
Nuk ka asnjë të dhënë që lidh Haaland me ngarkesën e drogës. Futbollisti norvegjez është përdorur vetëm si imazh në paketimet e sekuestruara.
Ekuadori vijon të përballet me një problem të rëndë të trafikut të drogës dhe krimit të organizuar, pasi vendi shërben si një pikë e rëndësishme tranziti për kokainën e prodhuar kryesisht në Kolumbi dhe Peru dhe të destinuar për tregjet e Amerikës së Veriut dhe Europës.
Policia ekuadoriane ka sekuestruar rreth 80 tonë drogë vetëm gjatë gjysmës së parë të vitit 2026, ndërsa gjatë vitit 2025 u sekuestruan rreth 215 tonë dhe në vitin 2024 afro 295 tonë.
Imazhi i Haaland duket se është përdorur nga trafikantët në një moment kur sulmuesi norvegjez ka marrë vëmendje të madhe ndërkombëtare pas paraqitjeve të tij në Kupën e Botës. Edhe më parë, autoritetet kanë gjetur paketime droge me imazhe të futbollistëve të njohur, përfshirë kapitenin e Argjentinës, Lionel Messi.
