‘Tekstilet dhe këpucët’ mbajnë padyshim vendin e parë si grupmallrat që Shqipëria eksporton më shumë. Nga viti në vit, sipas Institutit të Statistikave, shifrat kanë ndryshuar ndjeshëm.
Nëse në vitin 2014 Shqipëria ka eksportuar 85.9 milionë lekë grupmallra ‘tekstile dhe këpucë’, në vitin 2019, vlera e këtyre grupmallrave në eksport ka qenë 117.3 milionë lekë. Në 5 vite, kjo vlerë ka ndryshuar me më shumë se 37.8 milionë lekë.
Po njësoj, edhe grupmallrat ‘materiale ndërtimi dhe metale’ kanë ndjerë një rritje të konsiderueshme. Në vitin 2018, sipas INSTAT, Shqipëria ka eksportuar 53.1 milionë lekë grupmallra ‘materiale ndërtimi dhe metale’, ndërkohë që në vitin 2014, kjo vlerë ka qenë 37.1 milionë lekë, pra rreth 16 milionë lekë më pak.
E njëjta gjë ka ndodhur edhe me eksportin e ushqimeve, pijeve dhe duhanit. Këto grupmallra, në 5 vite, Shqipëria i ka eksportuar me 15.5 milionë lekë më shumë si vlerë.
INSTAT tregon se në 2014- ën, eksporti i grupmallrave ‘ushqim, pije, duhan’ ka qenë në vlerën e 16.7 milionë lekëve. Pesë vite më vonë, eksporti i këtyre grupmallrave ka kapur vlerën e 32.3 milionë lekëve.
Sipas statistikave të INSTAT, edhe eksporti i grupmallrave ‘makineri, pajisje dhe pjesë këmbimi’ ka ndryshuar ndjeshëm përgjatë viteve 2014 – 2018.
Në vitin 2014, eksporti i këtyre grupmallrave ka qenë në vlerën 9.2 milionë lekë, në 2015- ën, 10.7 milionë lekë, në 2016- ën, 11.2 milionë lekë, 15 milionë lekë në 2017- ën, ndërsa në vitin 2018, kjo vlerë ka shënuar 18 milionë lekë.
Eksporti i grupmallrave ‘produkte kimike dhe plastike’, gjithashtu bën pjesë tek grupmallrat që ka rritur ‘sadopak’ eksportin shqiptar. Në vitin 2014, Shqipëria ka eksportuar 3.3 milionë lekë grupmallra ‘produkte kimike dhe plastike’, ndërsa në 2018- ën, kjo vlerë ka qenë 6.1 milionë lekë.
Por, INSTAT tregon se rënie të theksuar eksporti, kanë ndjerë grupmallrat ‘Minerale, lëndë djegëse, energji elektrike’. Këto të fundit, në pesë vite, kanë ulur eksportin vendas me 29.4 milionë lekë.
Në vitin 2014, Shqipëria i ka eksportuar këto grupmallra në vlerën 85.8 milionë lekë; në vitin 2015, kjo vlerë ka qenë 64.5 milionë lekë, duke u diferencuar me 21.3 milionë lekë.
Po njësoj, rënia në vlerën e eksportuar të këtyre mallrave është ndjerë edhe në vitin 2016, në të cilin Shqipëria ka eksportuar grupmallra ‘Minerale, lëndë djegëse, energji elektrike’ në vlerën 46.5 milionë lekë.
Në vitin 2017, kjo vlerë shënoi 43 milionë lekë, derisa në vitin 2018, Shqipëria arriti në 56.3 milionë lekë eksport grupmallrash ‘Minerale, lëndë djegëse, energji elektrike’.
Nga ana tjetër, grupmallrat që në këtë pesëvjeçar, kanë ndjerë ‘luhatje’, janë ‘lëkurë dhe artikuj prej lëkure’ dhe ‘prodhime druri dhe letre’.
Megjithatë, edhe pse në ndonjë vit diku më pak, e në ndonjë vit diku më shumë, eksporti i këtyre grupmallrave përgjatë viteve 2014-2018 ka mbajtur përgjithësisht ‘të njëjtën rrymë’. (Scan)
