Në majin e këtij viti, eksportet, edhe pse me një rritje të vogël prej 1.2% më shumë se i njëjti muaj i një viti më parë, i janë kthyer trendit pozitiv.
Kjo rritje, sipas Institutit të Statistikave, erdhi kryesisht nga grupet “Minerale, lëndë djegëse dhe energji elektrike”, si dhe nga eksportet e produkteve ushqimore dhe veshjeve. Megjithatë, një ndikim negativ në total ka pasur grupi i “Materialeve të ndërtimit dhe metaleve”.
Për gjithë pesëmujorin janar-maj, eksportet arritën në 168 miliardë lekë, me një rritje vjetore prej 2.1%. Ndërkohë që importet për muajin maj u ulën me 2.1% krahasuar me majin e kaluar, por duke shënuar një rritje prej 2.6% në krahasim me muajin paraardhës.
Kjo ulje vjetore është ndikuar kryesisht nga tkurrja e importeve të “mineraleve dhe energjisë”, si dhe të “materialeve të ndërtimit dhe metaleve”. Në të kundërt, janë rritur importet e produkteve ushqimore, kimikateve dhe tekstileve.
Edhe pse deficiti tregtar në 5 muajt e parë të vitit është ngushtuar, ai sërish mbetet në shifra të larta, në vlerë prej 187 miliardë lekësh, çka do të thotë se vendi ynë vijon të jetë një vend që importon shumë më tepër sesa eksporton.
Në ndarjen sipas vendeve, rritja më e fortë e eksporteve në maj është regjistruar drejt Kosovës, Turqisë dhe Spanjës, ndërsa janë tkurrur eksportet drejt Italisë, Greqisë dhe Gjermanisë.
Sa i përket importeve, krahas rritjes nga Kina, është shënuar një rritje edhe nga Greqia dhe Gjermania, ndërsa Italia dhe Turqia kanë shënuar rënie.
