Në zgjedhjet e së dielës në Greqi asnjëra nga partitë nuk mori shumicën absolute të deputetëve në Parlamentin grek. Në këto kushte, shteti fqinj mund do shkojë sërish në raundin e dytë, por kësaj here jo me sistemin aktual zgjedhor.
Hulumtuesja Eda Gemi tha për “Ballkan Update” në ABC News se në raundin e dytë, i cili pritet të mbahet në fillim të korrikut do aplikohet sistemi proporcional i përforcuar, sipas të cilit partia që merr 25% të votave merr automatikisht 25 deputetë plus, duke i krijuar kështu komoditetin dhe shumicën absolute në parlament.
“Ne aktualisht flasim për sistemin proporcional të thjeshtë, nëse partia nuk merr shumicën, shkojmë në zgjedhjet të dyta, të cilat do kryhen jo më me sistemin proporcional të thjeshtë, por me sistemin proporcional të përforcuar. Raundi i dytë, pra, nëse nuk ka fitues nga raundi i parë, që pre supozohet në fillim të korrikut do jete sistemi proporcional i përforcuar, ku kemi sistemin e bonuseve. Partia që merr 25 % të votave, automatikisht ka bonus me 20 mandate më shumë dhe është i përshkallëzuar”, tha ajo.
Në zgjedhjet e djeshme partia e Kyriakos Mitsotakis Demokracia e Re, e cila është parti konservatore, mori një epërsi prej 40.8%, duke mposhtur partinë e së majtës së thellë Syriza, e cila qeverisi nga viti 2015 deri në vitin 2019, me 20.1%.
Sipas parashikimeve të Ministrisë së Brendshme të Greqisë, Demokracia e Re pritet të sigurojë 145 vende në parlament, vetëm gjashtë vende më pak nga se i duheshin për të krijuar një shumicë absolute në Parlammentin grek prej 300 vendesh.
Nga dita e sotme, sipas ligjit, presidentja greke Katerina Sakellaropoulou do t’u japë partive kryesore Demokracisë së Re, Syriza-s dhe PASOK-ut socialist tre ditë kohë për të tentuar të formojnë një qeveri koalicioni.
Nëse këto përpjekje dështojnë, atëherë Sakellaropoulou do të emërojë një qeveri të përkohshme për të përgatitur zgjedhjet e reja rreth një muaj më vonë.
Në këto zgjedhje garuan edhe shtatë kandidatë shqiptarë nga parti të ndryshme greke, por asnjëri prej tyre nuk arriti dot të zgjidhej deputet./m.j
