Autori i vrasjes së 3 grave dhe plagosjes së 3 të tjerave në Tiranë, Dan Hutra, mund t’i nënshtrohet një akt ekspertimi për gjendjen e shëndetit të tij mendor.
Prokuroria e Tiranës ende nuk e ka kërkuar një akt të tillë, por ka lënë të hapur mundësinë që gjatë hetimeve, për shkak të qëndrimeve të tij jo të zakonshme, të kërkojë nga mjekësia ligjore të shprehet për shëndetin mendor të 41-vjeçarit.
Një vlerësim për gjendjen e tij psikologjike u kërkua nga Gjykata e Tiranës edhe gjatë seancës për masën e sigurisë, ku Dan Hutra u mbyll në qeli pa afat për disa akuza, më e rënda prej tyre ajo e vrasjes për shkak të marrëdhënieve familjarë në 4 raste, 2 prej të cilave në tentativë.
41-vjeçari Hutra gjatë kësaj seance nuk shprehu pendesë për asnjë nga vrasjet, duke u justifikuar se për secilën prej tyre kishte një motiv. Ai i tha hetuesve se pasi doli nga burgu ku vuajti dënimin për dhunë në familje, kishte menduar të kryente vrasjet.
Familjen e ish-bashkëjetueses, Elena Hysa tha se donte ta shuante për shkak se e kishin akuzuar pa të drejtë për dhunë në familje dhe se kishte dyshime për atësinë e fëmijës. Ndërsa Marjana Gurakuqin dhe Etleva Kurtin, për të marrë hak për një plan vrasje që Gurakuqi dhe vëllai i Etlevës, kishin bërë kur Hutra ishte në burg. 41-vjeçari u arrestua në tentativë për të kryer një vrasje të 4, e motivuar nga hakmarrja për vrasjen e babait të tij vite më parë.
/a.r
