Eksperienca holandeze në administrimin e ujit të pijshëm dhe shërbimit ndaj qytetarëve do t’i shërbejë edhe Ndërmarrjes së Ujësjellës Kanalizimeve të Bashkisë së Tiranës për të rritur efikasitetin në administrimin e kompanisë si dhe në reduktimin e ujit të papaguar. Falë marrëveshjes së bashkëpunimit të nënshkruar në fund të vitit të shkuar mes Bashkisë së Tiranës me dy nga agjencitë kryesore të ujësjellësit në Holandë, një grup ekspertësh holandezë nga kompania “Dunea” kanë mbërritur në Tiranë për të ndihmuar UKT-në që të rrisë kapacitetet menaxhuese me qëllim final përmirësimin e shërbimit dhe furnizimit me ujë të qytetarëve.
Ekspertët holandezë kanë zhvilluar një sërë seancash trajnimi me specialistët e njësive përkatëse dhe departamenteve të UKT-së për përmirësimin e procedurave me konsumatorin dhe reduktimin e ujit pa të ardhura.
Ndërkohë që paralelisht me punën për të rritur kapacitetet menaxhuese bazuar në eksperiencën më të mirë holandeze, UKT-ja pritet të nisë punën në dy investime kryesore. Së pari, një tubacion i cili sjell ujin nga Bovilla, në zonën e Astirit dhe të Unazës së Re, dhe së dyti, një investim për rritjen e kapacitetit të filtrimit në Bovillë, që do mundësojë dyfishimin e ujit që filtrohet për të furnizuar qytetin e Tiranës.
a.ç
