Fenomeni i eksodit gjithnjë e në rritje i qytetarëve të Ballkanit, dhe veçanërisht shqiptarëve ka alarmuar qeverinë gjermane me në krye kancelaren Angela Merkle. Sipas asaj që raportojnë mediat gjermne, Merkel ka thirrur në një takim urgjent më 8 Maj për këtë situatë kryeministrat e landeve gjermane, ku temë kryesore do të jetë shpenzimet e akomodimit të emigrantëve.
Kjo vjen pas ankesave të kryeministrave të disa Landeve. Ka qenë kryeministri i Landit të Saksonisë së Poshtme i cili kërkoi trajtimin edhe më të shpejtë të kërkesave për azil që vijnë nga qytetarët e Kosovës, Shqipërisë dhe Serbisë.
Sipas mediave gjermane 40% e azilkërkuesve në Gjermani aktualisht vijnë nga Ballkani. Stephan Weil i partisë Socialdemokrate ka kërkuar që të përshpejtohet sa të jetë e mundur trajtimi i kërkesave për azil nga vendet e Ballkanit Perëndimor. Ai ka theksuar se kërkesat e azilantëve nga këto vende do të refuzohen në masën 99%.
Stephan Weil ka kritikuar faktin që trajtimi i këtyre kërkesave zgjat më shumë se një vit, megjithëse vetë azilkërkuesit e kanë të qartë se ata nuk kanë të drejtë azili në Gjermani. Me procedime të përshpejtuara sipas tij mund të arrihet reduktimi i numrit të azilkërkuesve nga vendet e Ballkanit.
Redaksia Online
(JavaNews.al)
