Email-et e bëra publike nga Wikileaks të negociatave mes Shërbimit Informativ Shtetëror dhe kompanisë “Hacking Team” risollën në vëmendje edhe një herë temën aq shumë të diskutuar të përgjimeve nga autoritetet sekrete.
Bëhet fjalë për një pajisje programuese e quajtur “Remote Control System Galileo”, e aftë që të përgjojë në distanca të largëta dhe pa u vënë re përmes metodave specifike. JavaNews.al ka mësuar përmes burimeve se në fakt SHISH e ka blerë dhe e ka vënë në përdorim këtë program që prej fillimit të vitit 2015.
Pajisja e re përgjuese i mundëson tashmë SHISH për të marrë në mënyrë të fshehtë të dhëna si nga kompjuterat ashtu edhe nga telefonat celularë, veçanërisht smartphonët. Sipas burimeve për JavaNews.al, në momentin që ky program ka depërtuar në sistemin operativ, arrin të marrë informacione në lidhje me të gjitha komunikimet e kryera si Facebook, E-mail, Twitter, Skype, WhatsApp, Viber etj.
Negociatat ndërmjet kompanisë dhe institucionit të sigurisë kombëtare shqiptare, kanë nisur që prej vitit 2013, ndërsa janë finalizuar pas rreth 2 vitesh.
Po ashtu JavaNews.al mëson se kjo pajisje është marrë në kuadër të luftës ndaj terrorizmit kryesisht, me qëllim për t’iu përafruar metodave teknologjike botërore. Pjesë e përgjimeve të kryera nga SHISH përmes kësaj pajisje kanë qenë persona të dyshuar për terrorizëm. Por jo vetëm kaq, pasi pajisja është vënë në funksion edhe në kuadër të përgjiemeve për parandalimin e ngjarjeve kriminale.
Mësohet gjithashtu se këto lëvizje të SHISH vijnë edhe në kuadër të sygjerimeve nga partnerët ndërkombëtarë dhe shërbimet e tjera inteligjente ndërkombëtare. Megjithatë, si pjesë e masave të sigurisë kombëtare, nuk përjashtohet përgjimi as për zyrtarë apo edhe qytetarët të dyshuar në veprime të jashtëligjshme, por kjo ende e pakonfirmuar.
Ditën e sotme, Shërbimi i Inteligjencës Shqiptare, përmes një komunikate për shtyp sqaroi se marrja e pajisjeve të tilla është pjesë e punës së SHISH dhe se është në përputhje me ligjin. Por në komunikatë edhe vetë SHISH nuk mohonte negociatat me kompaninë “Hacking Team”.
