Kohët e fundit banorë të zonës së komunës Qesarakë, në Tiranë janë ankuar në lidhje me bllokimin e rrugës që ish-Presidenti Bamir Topi i ka bërë rrugës në lagjen “Kodra e Priftit”.
Rruga, e cila më parë ishte e hapur për banorët e lagjes, tashmë është bllokuar me blloqe betoni dhe një punonjës i Gardës nuk lejon kalimin as me biçikletë. Madje rrugës së cilës Topi i ka vënë edhe emrin e gjyshit të tij “Dalip Topi”, i është vendosur edhe një tabelë ku shkruhet “Rrugë Private”.
JavaNeës.al është interesuar për këtë shqetësim dhe ka kontaktuar me telefon kreun e Komunës Dajt Kujtim Qefalia. Në fjalën e tij ai theksoi se vendimi që rruga të bllokohet dhe të cilësohet private nuk është marrë nga Këshilli i Komunës.
Qefalia ka nënvizuar se juridiksioni i komunës që ai drejton shkon deri tek tabela, ndërsa më tutje rruga është nën juridiksionin e Bashkisë së Tiranës, duke lënë të kuptohet që vendimi për këtë bllokim është marrë nga bashkia e kryeqytetit.
“Në juridiksionin tonë, rruga është deri tek tabela, ndërsa më tutje është nën juridisksionin e bashkisë së Tiranës.” është shprehur Qefalia
