Shërbimi Informativ Shtetëror i Shqipërisë nuk e ka cilësuar grupin e armatosur në Kumanovë si një grup terrorist. Kjo është përgjigja përmes burimeve të afërta nga SHISH për JavaNeës.al, referuar artikullit të bërë publik ditën e sotme nga gazeta maqedonase “Vecer”. Në artikull gazeta akuzonte shërbimin inteligjent shqiptar se nuk ka njoftuar autoritetet maqedonase për ngjarjen në Kumanovë, edhe pse kishte dijeni për të prej mëse një viti.
Por nga ana tjetër burime për JavaNews.al bëjnë të ditur se SHISH shkëmben informacion me vendet fqinje, mes të cilëve edhe Serbia, vetëm për çështje që kanë të bëjnë për terrorizmin.
Në këtë mënyrë pretendimi i gazetës maqedonase se SHISH nuk ka informuar Maqedoninë, lë të kuptohet se autoritetet e inteligjencës shqiptare, nuk e kanë cilësuar grupin e armatosur të UÇK-së, si një grup terrorist.
Po të njëjtat burime nënvizojnë se SHISH shkëmben informacione me Shërbimet Inteligjente të vendeve fqinje, veçanërisht për luftën ndaj terrorizmit. Në këto vende bën pjesë edhe Serbia, me të cilën SHISH dhe BIA (Shërbimi Informativ i Serbisë) nuk shkëmbenin informacion më përpara, duke treguar edhe një herë “shkrirjen e akullit” mes dy vendeve, tashmë jo vetëm në politikë dhe ekonomi, por edhe tek shërbimet sekrete.
Më herët mediat kanë raportuar në lidhje me ngjarjen e Kumanovës, se shërbimi inteligjent serb, e ka njoftuar Maqedoninë për praninë e grupit të armatosur të UÇK-së. Në këtë mënyrë, duke i qëndruar faktit të shkëmbimit të informacionit mes Shqipërisë dhe Serbisë për çështje të terrorizmit, lë të kuptohet se Kumanova nuk është kategorizuar si grup terrorist nga ana e autoriteteve shqiptare. Ose në të kundërt, kanë qenë autoritetet serbe të cilat nuk kanë bërë kalimin e informacionit tek Shërbimi Inteligjent Maqedonas, gjithnjë nëse SHISH do ta kishte parë si terrorizëm grupin e armatosur.
Por nëse UÇK-ja do të ishte cilësuar si terrorizëm nga ana e SHISH atëherë ky institucion do të ishte informuar vetë autoritetet e Maqedonisë.
Çështja e Kumanovës mbetet ende edhe sot një çështje me mjaft pikëpyetje, lidhur me aksionin policor që ndodhi ku mbetën të vrarë 8 oficerë policie dhe 14 persona të tjerë.
