Pas Policisë së Shtetit edhe Shërbimi Informativ Shtetëror ka konfirmuar faktin se konflikti i dhunshëm në Laç, nuk ka ndodhur brenda apo pranë Komisariatit të Policisë. Lajmi bëhet i ditur nga burime të sigurta për ‘Java News’, të cilët tregojnë se si ndodhi ngjarja e rëndë në Laç ku u plagosën 7 persona si dhe u arrestua edhe deputeti i PS Armando Prenga.
Të njëjtat burime nënvizojnë se konflikti mes familjeve Prenga dhe Cali ka ndodhur në lokalin e familjes Cali në Patok. Sherri mes tyre ka përshkallëzuar në perdorimin e sendeve të forta, mjeteve prerëse madje edhe armëve të zjarrit për pronësinë e Lagunës së Patokut. Ka qenë pikërisht deputeti Prenga i cili ka nxjerrë armën dhe ka qëlluar fillimisht me qytën e pistoletës dy anëtarë të familjes Cali, dhe më pas ka qëlluar në ajër. Forcat e rendit janë njoftuar për situatën duke mbërritur në vendin e ngarjes.
Pas arrestimit të 34 personave në kushtet e flagrancës, mes tyre e deputetit të PS, ata janë transportuar në Komisariatin e Polocisë. Burime nga SHISH për JavaNews.al tregojnë ekskluzivisht se situata në Komisariat ka qenë shumë e tensionuar, me forca të shumta policie që thuhet se të kujtonte vitin e errët 1997.
Në këtë moment janë njoftuar autoritetet më të larta të rendit si Ministri Saimir Tahiri, Kryeprokurori Adriatik Llalla, Kreu i SHISH Visho Ajazi dhe Kryeministri Edi Rama. Autoritetrt kanë vendosur transportimin e deputetit të vënë në pranga në Drejtorinë e Policisë në Tiranë, ndërkohë që Llalla ka njoftuar Kuvendin për të marrë autorizimin e nisjes së hetimeve dhe mbajtjen në pranga te Prengës.
