Autoritetet gjermane dhe ato shqiptare prej muajsh kanë përsëritur thirrjen drejtuar shqiptarëve që të mos aplikojnë për azil, pasi përgjigja do të jetë negative. Kjo pasi Gjermania, si shumë vende të tjera të Bashkimit Evropian, e cilëson Shqipërinë në vend të sigurtë.
Por pavarësisht kësaj, azilkërkuesit shqiptarë vijojnë të jenë të shumtë në numër, duke u kthyer në problem real për Gjermaninë. Nuk është vetëm akomodimi, por edhe rendi nëpër kampe së fundmi është kthyer në problem serioz për autoritetet gjermane.
Si shqiptarët ashtu edhe sirianët, prej kohësh mësohet se konfliktohen mes tyre për natyra banale. Por konfliktet mes tyre degradojnë deri në përdorimin e sendeve të forta dhe mjeteve prerëse.
E fundit ka ndodhur në qytetin e Frankfurtit, në një kamp azilkërkuesish në Gießen. JavaNews.al ka mësuar eksluzivisht nga shqiptarët që ndodhen aty, se ditën e sotme mes shqiptarëve dhe sirianëve ka pasur konflikt të dhunshëm ku janë përdorur edhe shkopinj dhe thika e mjete të tjera prerëse.
Në fotografitë që sjell ekskluzivisht JavaNews.al, shihet një numër i madh të rinjsh që janë bërë pjesë e konfliktit të dhunshëm.
Po ashtu bëhet e ditur se për të qetësuar situatëm është dashur ndërhyrja e një numri të madh forcash policie. Si pasojë e dhunës së ushtruar mes tyre, raportohet për disa persona të plagosur, mes tyre shqiptarë dhe sirianë.
Nga ana e tyre autoritetet gjermane kanë bërë ndalimin e personave të përfshirë në konflikt, ndërsa deri më tani nuk raportohet për të vdekur.
Sipas raportimeve që vijnë nga Gjermania nënvizohet se të tilla konflikte janë bërë tashmë të shpeshta nëpër kampet e azilkërkuesve, duke u kthyer në një tjetër problem serioz për autoritetet gjermane.
