Këngëtarja e mirënjohur, Anjeza Shahini, në një prononcim ekskluziv për Javanews shprehet se për momentin ende nuk ka një projekt të ri muzikor pasi në këto momente i është përkushtuar tërësisht jetës së saj personale të kurorëzuar së fundmi me martesë.
Ajo shprehet se me dashje momentalisht ka qëndruar larg prozhektorëve të skenave.
“Është bërë tashmë një vit që nga dalja ime e fundit në skenë. Me dashje, kam ndejtur larg prozhektorëve. I kam dhënë kohë jetës time personale dhe së fundmi martesës time. Ende nuk kam asnjë projekt te ri artistik”, u shpreh Shani.
Sipas saj, aktualisht është duke u shkëputur nga Shqipëria për në Angli, ku jeton edhe bashkëshorti i saj. Shahini nënvizon se do gënjente nëse do deklaronte se ka një projekt të ri muzikor.
“Do doja që gjithcka në lidhje me muzikën, t’ja lija të ardhmes. Në të shumtën e rasteve, nuk kam mbajtur axhendë për projektet e mia muzikore. Pjesa më e mirë e tyre kanë lindur rastësisht ose nga grimca inspirimi”, komenton Shahini.
Sipas saj, të bësh muzikë në Shqipëri, do të thotë të investosh kohë. Por ajo nënvizon se ka bërë një zgjedhje tjetër, që për momentin kohën ta investoj për jetën e saj të re martesore.
