Ish-ministri Dritan Prifti ka thyer heshtjen sa i përket akuzave të ngritura ndaj tij dhe deputetit Tom Doshi nga kreu i Komisionit të Sigurisë.
Në një prononcim për ‘JavaNews.al’ Prifti tha se fakti që emri i tij po lakohet nga Braho për të ashtuquajturin konspiracion ndaj Ilir Metës, tregon frikën që ky i fundit ka nga një hetim ndërkombëtar.
“Kjo tregon frikën që ka Ilir Meta për hetim ndërkombëtar. Unë personalisht nuk e kam takuar kurrë të shoqen e Kastriot Ismailajt. Që në vitin 2010-2012 e kam denocnuar kontratën CEZ-DIA si një aferë korruptive” – thotë Prifti për ‘JavaNews.al’.
Ai shprehet se është i gatshëm të dëshmojë për këtë çështje në çdo moment që do ta thërrasin.
Gjatë ditës së sotme, deputeti Spartak Braho përmes një letre të hapur drejtuar krerëve të shtetit është shprehur se Prifti dhe Doshi kanë një skenar për të krijuar destabilitet politik.
