EKSKLUZIVE/ Dokumentet që duhen për të fituar bashkimin familjar në Greqi

EKSKLUZIVE/ Dokumentet që duhen për të fituar bashkimin familjar në Greqi

Autoritetet greke më në fund kanë firmosur ndryshimet në Kodin e Emigracionit, ku veç të tjerash parashikohet pajisja me leje për bashkim familjar për prindërit (pavarësisht nëse është nëna apo babai), që kanë lindur fëmijë në Greqi. Nga kjo dispozitë favorizohet një numër i konsiderueshëm nënash që deri më tani kanë qenë pa leje qëndrimi, e rrjedhimisht e kishin të vështirë edhe të punonin.

E drejta që të pajisen me leje qëndrimi prindërit që u kanë lindur fëmijë në Greqi, sanksionohet në paragrafin 46 të nenit 8 të ligjit të ri (4332/15), që u miratua më 9 korrik nga Parlamenti grek.

Kjo mënyrë e pajisjes me leje qëndrimi anashkalon praktikën e deritanishme ku i interesuari duhej t’u nënshtrohej një sërë procedurash burokratike, që duhej të kurorëzoheshin me dhënien e vizës nga autoritetet konsullore greke në Shqipëri, ku duhej patjetër të shkonte e interesuara e që andej të bënte hyrjen e ligjshme në Greqi.  Ligji  i ri nuk vë asnjë kufizim për hyrjen e ligjshme në të të interesuarit në Greqi, domethënë nuk ka rëndësi nëse hyri në mënyrë të ligjshme apo të paligjshme.

Çfarë dokumentacioni kërkohet

Vendimi ministror përcakton dokumentacionin që kërkohet për lejen e qëndrimit për bashkim familjar:

– Formulari i aplikimit,

– 2 (dy) fotografi aktuale, në format pasaporte, të arkivuara edhe në trajtë elektronike (CD) dhe në formatin JPEG 2000.

– Kopje të legalizuar të pasaportës së vlefshme.

– Kopje të lejes së qëndrimit të personit kujdestar, e vlefshme dhe të paktën dy vjeçare.

– Çertifikatë lindjeje e fëmijve në Greqi, deri në ditën e hyrjes në fuqi të ligjit 4332/2015 (që u miratua në korrik të këtij viti).

– Dëshmi se banon në Greqi pas lindjes së fëmijve.

– Siguracion të ngjashëm me të personit kujdestar.

– Taksa (paravolo) që paguhet në mënyrë elektronike, me vlerë 300 euro.

Redaksia Java News/ f.g