Detektivët privatë zbarkojnë zyrtarisht në Shqipëri. Tashmë edhe vendi ynë do të ketë detektivët e tij privatë për të hetuar lidhur me çështje nga më të ndryshmet dhe më socialët.
Kjo u konfirmua për Javaneës.al nga avokati Ndue Pjetra i cili i kontaktuar me telefon, bëri të ditur se profesioni i detektivit privat është ligjëruar dhe miratuar edhe nga Ministria e Mirëqënies Sociale.
Pjetra theksoi se tashmë është ngritur Instituti i detektivit privat dhe çdokush që përmbush kriteret, do të mund të ushtrojë profesionin e detektivit privat. Fillimisht detektivët privatë do të mund të merren me çështje që kanë të bëjnë me persona të rezultuar të humbur, vjedhjet e makinave, persona që i shmangen përmbarimit, apo edhe tradhëtitë bashkëshortore.
“Tashmë detektivi privat është një profesion i ligjshëm dhe i lirë në Shqipëri. Është miratuar nga Ministria e Mirëqënies Sociale, dhe është ngritur Instituti i detektivit privat. Çdokush që përmbush kriteret do mund të marrë liçensën e detektivit privat. Ata do kujdesen për çështje që kanë të bëjnë me vjedhjet e makinave, persona të humbur, persona që i shmangen zyrave të përmbarimit ose bankave që kanë marrë një kredi dhe si rezultat i kësaj nuk gjendet adresa. Detektivët do të mund të merren edhe me çështje të tradhëtisë bashkëshortore”. u shpreh Pjetra për Javaneës.al
Avokati nënvizoi faktin se së shpejti pritet të miratohet edhe ngritja e Dhomës Kombëtare të Detektivëve Privatë. Kjo siç sqaroi Pjetra do të mundësojë dhe t’i japë të drejtën detektivëve privatë që edhe të kryejnë arrestime apo qoftë edhe të mbrohen dhe paraqesin provat e mbledhura prej tyre në gjykatë.
“Së shpejti pritet të ngrihet edhe Dhoma Kombëtare e Detektivëve Privatë siç është në Kanda apo edhe SHBA. Kjo do u japë të drejtën atyre që të bëjnë arrestime, apo edhe të paraqesin provat dhe mbrohen në gjykatë. Tani kushdo nga detektivët privatë mund të regjistrojë pranë QKR aktivitetin e tij, qoftë në mënyrë individuale apo qoftë edhe një grup detektivësh.” përfundoi Pjetra
Pjetra tha se në faqen online të këtij Institutit të Detektivëve Privatë mund të gjenden kriteret që duhet të plotësojë çdo kandidat për t’u bërë dedektiv privat, për të cilët ka dhe një kod pune.
Redaksia Online
(Javanews.al)
