Blendi Gonxhe i rikthehet zyrtarisht politikës, këtë radhë nën siglën e Partisë Demokristiane të Nard Ndokës. I kontaktuar me telefon, Ndoka bëri të ditur për JavaNews.al se Gonxhe do të jetë pjesë e garës për zgjedhjet e 21 qershorit për të qenë anëtar i Këshillit Bashkiak të Tiranës.
Kreu i PDK-së konfirmoi se Gonxhe do të jetë i pari në listën e kandidatëve për këshilltarë të kësaj force politike në Tiranë.
“Po është e vërtetë, Blendi Gonxhe do të garojë për PDK për Këshillin Bashkiak të Tiranës. Ai është i pari në listën tonë, dhe do të jetë së bashku me stafin e profesionistëve të përzgjedhur nga ai.” u shpreh Ndoka
Për Blendi Gonxhen ky është një rikthim në politikë pasi më herët ka qenë nënkryetar i Bashkisë së Tiranës, në kohën kur Edi Rama ishte kryetar i saj.
Gonxhe ka qenë protagonist i lëvizjes së dhjetorit 1991 dhe bashkëpunëtori i ngushtë i Ramës në vitet 2000.
Redaksia Online
(Javanews.al)
