Banka Botërore përmirëson parashikimin për ekonominë shqiptare nga një rritje në 3.6 për qind, në 4 për qind. Sipas përfaqësues së Bankës Botërore arsyeja e rritjes është sektori i energjisë. Ajo quan sukses edhe Eurobondin.
Banka Botërore ngriti parashikimin për rritjen e ekonomisë shqiptare gjatë këtij viti nga 3.6 për qind në 4 për qind. Kryeekonomistja e bankës për Shqipërinë tha se në gjysmën e parë të vitit ekonomia është rritur me shpejt nga sa pritej duke shpjeguar edhe arsyet.
“Parashikimi është rritur me 0.4 për qind dhe arsyeja për këtë është energjia, e cila ka dhënë gati gjysmën e kontributit të rritjes ekonomike në gjashtëmujorin e parë”, u shpreh përfaqësuesja e BB.
Banka tha se zgjerimi i Prodhimit kombëtar dhe ulja e borxhit publik kanë përmirësuar besimin në ekonominë shqiptare, jo vetëm brenda vendit, por edhe në tregjet e huaja
“Pjesëmarrja në tregjet e huaja e ekspozon vendin ndaj disiplinës së tregut dhe fakti që Shqipëria e emetoi Eurobondin me një normë më të ulët se sa vitet e mëparshme tregon se tregjet kanë shfaqur një konfidencë në reformat dhe ecurinë e ekonomisë shqiptare”, u shpreh përfaqësuesja e BB.
Por shefja e zyrës së bankës në Tiranë, Maryam Salim tha se ekonomia penalizohet ende nga korrupsioni, që sipas saj është i përhapur.
“Duhet të reduktohet korrupsioni sepse është endemik. Ju shikoni çështje korrupsioni që ngrihen ose shqetësime për korrupsion në shumë vrojtime. Dhe kjo është një pengesë për investimet e sektorit privat”, u shpreh ajo.
Banka i rekomandoi qeverisë të ulë më tej borxhin publik dhe të kufizojë koncesionet, veçanërisht ato të pakërkuara, të cilat sipas saj kanë rritur risqet për ekonominë dhe financat publike.
ma.me
