Nën drejtimin e Ministres së Zhvillimit Ekonomik, Turizmit, Tregtisë dhe Sipërmarrjes, znj. Milva Ekonomi, u zhvillua në MZHETTS takimi i radhës me task forcën për turizmin, e ngritur me urdhër të Kryeministrit, z. Edi Rama. Qëllimi i këtij takimi, lidhej me raportimin për ecurinë e deritanishme të sezonit të turizmit nga përfaqësuesit e institucioneve shtetërore në këtë task forcë.
Ministrja Ekonomi bëri prezent disa observime të raportuara nga katër grupet e punës të MZHETTS, të cilat dy javët e fundit kanë monitoruar situatën në terren nga Velipoja deri në Sarandë. Po ashtu ministrja Ekonomi solli në vëmendje shqetësimet e mbërritura nga qytetarët që lidhen me abuzimet për sa i përket çmimeve, pastrimit apo furnizimit me energji elektrike.
“Do të kërkoja nga Drejtoria e Përgjithshme e Tatimeve që në kontrollet e tyre të përfshijnë edhe monitorimin e afishimit të çmimeve në hotele dhe restorante në mënyrë që qytetarët të jenë të mirëinformuar” – tha Ekonomi.
Për sa i përket informalitetit, ministrja Ekonomi kërkoi një vëmendje të shtuar të pajisjes me NIPT të subjekteve private e në veçanti atyre të cilët kanë lidhur kontrata me bashkitë dhe kanë ndërtuar stacionet e plazheve private.
Ministrja Ekonomi u shpreh se: “Nga informacionet e deritanishme vërejmë se në përgjithësi turizmi është duke u zhvilluar mirë, por ka raste kur ne duhet të ndërhymë. Nevojitet një bashkëpunim akoma edhe më i shtuar me njësitë e pushtetit vendor për sa i përket pastrimit të plazheve publike”.
Problematikat dhe sugjerimet e këtij takimi do t’i komunikohen nëpërmjet një letre njësive të pushtetit vendor për të shtuar bashkëpunimin.
SHËNDETËSIA
Përfaqësuesi i Ministrisë së Shëndetësisë në këtë task forcë raportoi se në plazhet më të frekuentuara janë vendosur shërbime autoambulancë për t’u ardhur në ndihmë qytetarëve dhe minimizuar kohën e dhënies së ndihmës së parë. Sikurse në urgjencat shëndetësore të ngritura posaçërisht për sezonin turistik është shtuar numri i personelit. Është duke u punuar edhe për dezinfektimin. Po ashtu ai sugjeroi trajnimin një ditor të forcave policore të stacionuara në pikat kufitare dhe në të gjithë zonën bregdetare. Ky sugjerim u mirëprit nga përfaqësuesi i Policisë së Shtetit.
RENDI
Task forcës iu raportuan edhe masat e marra nga Policia e Shtetit për këtë sezon turistik. Në 31 plazhe në dete dhe liqene, si dhe në 7 zona turistike malore, janë dislokuar 740 forca policore. Po patrullohet bashkërisht me policinë e Kosovës. Është shtuar numri i sporteleve në pikat kufitare me lehtësira në kontrollin e dokumentacionit duke ndjekur një procedurë të përshpejtuar ku në pikat tokësore regjistrohet automjeti, shoferi dhe vetëm numri pasagjerëve. “Dy tragete me 2.220 persona ditën e djeshme në Portin e Durrësit janë përpunuar në një afat kohor 45 minuta” u shpreh përfaqësuesi Drejtorisë së Kufirit. U kërkua që Drejtoria e Rrugëve të ndërhyjë me vizimin e dy akseve rrugorë, Maminas-Gjiri i Lalzit dhe Kukës- Morinë.
ENERGJIA
Për këtë sezon turistik është ngritur një shtab pune i kryesuar nga administratori i OSHEE-së. Janë vendosur 16 numra telefoni për të gjithë vijën bregdetare për të njoftuar defektet. Në Himarë është vendosur një nënstacion lëvizës që rrit tensionin brenda nivelit të nevojshëm. Nga matjet ditore rezulton se niveli rrymës elektrike është brenda normave që nga Palasa deri në Sarandë. Defektet janë minimizuar dhe riparimi i tyre kryhet në një kohë fare të shkurtër.
TATIMET
Përfaqësuesi i Drejtorisë së Përgjithshme në këtë task forcë u shpreh se ishte në dijeni të rasteve kur abuzohet me çmimet dhe se subjekte të ndryshme janë ndëshkuar. Ai kërkoi që qytetarët ti denoncojnë këto raste pasi edhe kur çmimet janë të afishuara nga subjektet ka raste kur abuzohet përsëri.
TRANSPORTI
Task forcës iu raportua shtimi i sinjalistikës në zonat e plazheve dhe u premtua për më shumë vëmendje në zonën e Shëngjinit, e veçanërisht në ato pika që konstatohen si të rrezikshme nga policia rrugore. U kërkua shtimi i prezencës së policisë në tunelin e Elbasanit.
MJEDISI
ISHMP raportoi se janë kryer 486 inspektime në gjithë territorin e bashkive, përfshi edhe njësitë administrative të varësisë dhe rrugët nacionale ku janë vendosur 20 sanksione dhe janë lënë detyra. Janë inspektuar gjithë vend-depozitimet e mbetjeve në Nj.Q.V dhe janë lënë detyra që të kenë një kanal të jashtëm për të mos lejuar ujërat të përzihen me mbetjet e depozituara, të jenë të rrethuar dhe mos të mos lejohet të futen persona të pa autorizuar, të kenë disa tabela sinjalizuese dhe orientuese duke theksuar cilat mbetje lejohen dhe cilat ndalohet të depozitohen në atë territor. Janë inspektuar për zbatimin e kontratave dhe të lejeve mjedisore subjektet që janë kontraktore të bashkive për këto shërbime dhe ju janë lënë detyra e afate për rinovimin e lejeve, për pajisjen më leje mjedisore e me licenca III.2.B . Ndërkohë në bashkëpunim me Policinë e Shtetit po kryhen kontrolle për sa i përket ndotjes akustike.
AGJENCIA KOMBËTARE E BREGDETIT
Agjencia Kombëtare e Bregdetit raportoi se është duke monitoruar kontratat që bashkitë kanë lidhur me privatët në bazë të Vendimit të Këshillit të Ministrave . Deri më tani disponohet e gjithë lista e kontratave në Velipojë, Spille dhe pjesërisht për Sarandën. Për të gjitha këto subjekte, AKB, do të hartojë një raport i cili do të jetë baza e aplikimit të rilidhjes së kontratës sezonin e ardhshëm./java/a.k
