Efektivi special i RENEA-s, i cili mbeti i vrarë nga sulmi i organizuar kriminal në Lazarat, nuk përfiton dëmshpërblim nga sigurimi i jetës, pasi një kontratë e tillë nuk ishte realizuar për të.
Pavarësisht se ligji i ri i policisë ka parashikuar sigurimin e jetës, prej tre muajsh mbahen peng aktet normative, të cilat do t’i hapnin rrugë një procesi të premtuar prej 25 vitesh, por që edhe Ibrahim Basha nuk do të përfitojë prej tij.
Madje, kjo është konfirmuar edhe nga kryetari i Sindikatës së Punonjësve të Policisë, Sadetin Fishta, i cili ka treguar që deri më sot nuk është nënshkruar asnjë kontratë për sigurimin e jetës së efektivëve të repartit special RENEA, ashtu siç parashikohet në ligjin e ri të policisë.
Ligji i ri i policisë u miratua në shtator të vitit që shkoi, por Kuvendi i Shqipërisë i dha afat gjashtë muaj Policisë së Shtetit për të përgatitur aktet nënligjore, kështu që hyrja në fuqi e tij është bërë e mundur në fillim të muajit mars, kur është botuar edhe në Fletoren Zyrtare.
Mirëpo edhe pse kanë kaluar nëntë muaj nga miratimi i ligjit të ri dhe tre muaj nga hyrja në fuqi, ende nuk janë përpiluar të plota aktet nënligjore që shoqërojnë ligjin e Policisë së Shtetit, të cilat duhet të kishin përfunduar para muajit të tretë të këtij viti. Një nga këto akte duhej të ishte edhe vendimi i qeverisë për t’i hapur rrugë kontratës me kompani private për sigurimin e jetës së efektivëve të repartit special RENEA, ashtu siç është parashikuar në ligjin e policisë.
Megjithatë, kjo nuk është realizuar ende dhe në këto kushte, një tjetër familje policësh të vrarë, nuk do të përfitojë dëmshpërblim. Edhe për këtë vonesë, Policia e Shtetit nuk ka dhënë ndonjëherë sqarime, por nga ajo çka është perceptuar në disa dalje publike të funksionarëve të lartë apo takimeve të ndryshme, është fakti se gjatë gjithë këtyre kohëve është diskutuar me partnerët tanë të huaj që monitorojnë punën e policisë.
