Ministrja për Dialog dhe kryenegociatorja, Edita Tahiri, e cila po qëndron në Bruksel për të vazhduar negociatat me Serbinë, ka thënë se bisedimet në Bruksel për çështjet e drejtësisë kanë qenë të frytshme dhe ato do të vazhdojnë edhe sot.
Sipas saj, dy vendet negociuese janë shumë afër përcaktimit të datës finale për vendosjen e sistemit unitar të drejtësisë edhe në pjesën veriore të shtetit tonë, si rezultat i marrëveshjes së Brukselit.
Ajo, në një deklaratë për media, ka thënë se Kosova ka përmbyllur me sukses procesin e rekrutimit të stafit gjyqësor dhe prokuorial sipas ligjeve të Kosovës.
Zbatimi i kësaj marrëveshje, sipas ministres Tahiri, i jep fund ish strukturave paralele të drejtësisë në sistemin e Kosovës.
“Këto struktura paralele de facto kanë ndaluar operimin në fund të 2013, ndërsa de jure shpërbërja e tyre do të ndodh në momentin kur Serbia shfuqizon kontratat e punës dhe ndal pagat për këtë staf që më parë ka punuar në këto ish-struktura paralele.
Pas këtij veprimi, nis menjëherë fillimi i punës së sistemit të drejtësisë së Kosovës në pjesën veriore të vendit”, theksoi ajo, citohet Koha. (b.an)
