Serbia po e bllokon zbatimin e marrëveshjeve të arritura në Bruksel, thotë ministrja në detyrë për Dialog, Edita Tahiri. Sipas saj, marrëveshja për drejtësi nuk ka filluar së zbatuari, meqë Serbia nuk iu ka ndaluar pagat strukturave ilegale në veri të Mitrovicës. Ministrja Tahiri ka thënë se dekretimi i gjyqtarëve dhe prokurorëve nga ana e presidentit Hashim Thaçi nuk do të ndodhë, derisa Serbia nuk i ndal pagat ndaj e këtyre strukturave, raporton KTV.
Juristi Ehat Miftaraj, nga Instituti i Kosovës për Drejtësi, thotë se pasojat e moszbatimit të marrëveshjes për drejtësi janë të mëdha. Profesori universitar Vigan Qorrolli thotë se dialogu Kosovë-Serbi që në fillim ishte joserioz dhe si rezultat i kësaj edhe marrëveshjet nuk po gjejnë zbatim. Kohavisioni ka kërkuar një përgjigje edhe nga zyra për media e përfaqësueses së lartë të BE-së, Federica Mogherini, por zëdhënësja Maja Kocianqiq nuk ka kthyer përgjigje.
Marrëveshja për drejtësi në mes Kosovës dhe Serbisë ishte arritur në dhjetor të vitit 2016 në Bruksel. Zbatimi i kësaj marrëveshjeje ishte paraparë të nisë më 10 janar të këtij viti. (b.an)
