Gjatë një takimi në LIbofshë të Fierit, kryeministri Edi Rama ka komentuar sërish konfliktin e ‘Unazës së Re’.
Rama deklaroi se opozita udhëheq protestuesit për të ardhur në pushtet me dhunë, pasi nuk e mundi me votë.
“Kurrë nuk ka pasur një protestë të udhëhequr nga partitë për një gjë që ligji nuk e lejon. Luftë për pushtet, gjej shesh bëj përshesh. Edi Ramën nuk e mundim dot me votë dhe hajde të bëjmë këto, ti vëmë flakën” -tha Rama.
Duke folur për reformën e pronës, Rama tha se kthimi i hapësirës publike tek qytetarët është i domosdoshëm.
“Besoj se keni dëgjuar se çfarë po ndodh në Tiranë. Unaza e Re është konflikt artificial për qëllime mirfilli politike. Aty ku nuk mund të legalizojmë nuk e bëjmë dot, ku është plani për kopshte, çerdhe rrugë. As nuk mund të legalizojmë për të dhënë para sikur je pronar se i bie që gjithë shteti të punojë për vite që të paguajë ata që janë të palegalizueshëm. Unë paskësha thënë dikur se shtëpitë nuk prishen dhe tani do i prish! Por kjo nuk është e vërtetë, se në 8 vjet të qeverisë së mëparshme u legalizuan 21 mijë objekte, nga të cilat shumica ishin biznese. Ne kemi legalizuar 150 mijë në katër vjet dhe shumica dërrmuese janë shtëpi”, u shpreh Rama.”, deklaroi Rama.
Gjithashtu Rama lajmëroi ngritjen e Agjencisë Unike që do të shërbejë si mekanizmi i posaçëm për zgjidhjen e çështjeve të pronës.
“Nuk do ketë më Hipotekë apo ALUIZ-ëm dhe sorrollatje sa andej këtej. Agjencia kombëtare e titujve të pronësisë do trajtojë në mënyrë horizontale të gjithë problematikat e pronës. Brenda saj do ketë një mekanizëm të ri, një avokat të qytetarit, një mekanizëm që do ta përdorin qytetarët për të mos humbur kohë në gjykatë përpara se të gjejnë gjuhë ne përbashkët me institucionin aty” – tha Rama.
/b.d
