Edi Rama, më zi ta bëfshin!

Nga Armando Meta/

Drejtuesit e lartë të PD-së kanë bërë publike një nismë për të kallëzuar penalisht kryeministrin Edi Rama, lidhur me atë që drejtues të kësaj partie e konsiderojnë si “pastrim parash”, për pagesën prej 80 mijë dollarësh për një foto të kreut të qeverisë shqiptare me Presidentin e SHBA-së, Obama. Kjo çështje është edhe në hetim nga drejtësia amerikane ndaj një shtetasi shqiptar. Rama ka mohuar të ketë lidhje me pagesën 80 mijë dollarëshe që pretendohet nga PD-ja. Në fakt padia e PD-së, përveçse një konsumi mediatik, i sponsorizuar nga lobistë të saj në SHBA, nuk ka asnjë lidhje as me drejtësinë, as me të vërtetën, e as se mund të ngacmojë për nisjen e ndonjë hetimi. Është thjeshtë propagandë.

Por vullneti i tyre për të përlyer edhe Presidentin e SHBA-së Obama, mjafton vetëm që të nxijnë Ramën, është për t’u “admiruar”. Është fakt i njohur se kupola drejtuese e PD-së po noton në ujra shumë të turbullta këto muajt e fundit, për shkak të Reformës në Drejtësi. Kjo e ka detyruar opozitën në qendër dhe në bazë, të dalë hapur kundër SHBA-së dhe BE-së në më shumë se një rast.

Në fakt mirë ja bëjnë Edi Ramës. Madje edhe më zi. Krerët e PD-së janë kapur pas një fabule që mezi qëndron në këmbë, e cila duket si limonatë, po të marrësh në analizë se çfarë dramash dhe tragjedish janë konsumuar në këtë vend gjatë qeverisjes së tyre. Por duket se vetë Edi Rama i pari, “i ka harruar” tashmë këto fakte.

Gjatë qeverisjes së PD-së është shfarosur një fshat i tërë dhe janë vrarë 26 njerëz, vetëm për qëllim fitimesh të qeveritarëve të kohës dhe familjarëve të tyre. Ka shumë vend të besosh se Edi Rama e ka “fshirë” nga kujtesa Gërdecin dhe ndodhet tashmë në një planet tjetër.

Në 21 janar qeveria ka vrarë në mes të Tiranës, 10 metra poshtë zyrës kryeministrore, 4 protestues paqësorë të opozitës. Por sërish Edi Rama e ka fshirë tashmë nga kujtesa këtë ngjarje, ashtu siç u fshinë nga serverat e kryeministrisë pamjet e vrasjeve më 21 janar.

Është vërtetuar nga prokuroria se Lulzim Basha ka abuzuar në shifra mbi 200 milion euro për rrugën Durrës-Kukës, por Edi Rama nuk kujtohet nga pozita e kreut të ekzekutivit, që të shtyjë për vijimin e hetimeve mbi këtë akuzë.

Paraardhësi i tij në “fronin” kryeministror ka paguar para nga paratë e taksapaguesve për të linçuar mediatikisht në SHBA opozitën, në një dhunim flagrant të ligjeve dhe normave më elementare të demokracisë, por sot debatohet për një foto të Ramës me Obamën, jo për këto fonde që dikur u përdorën gjoja për “imazhin e Shqipërisë”.

Ish-qeveritarët e PD-së kanë vjedhur zgjedhje, para, kanë përgjuar, kanë grabitur me ligj dhe pa ligj pasuritë kombëtare dhe nuk u ka “hyrë gjemb në këmbë”. Por Edi Rama i ka “harruar” këto. Ajo që bën sot PD në fakt është shumë e thjeshtë. Diçitura e aksionit të saj është “bjeri t’i biem”.

Ata kuptuan me intuitën e tyre se e majta nuk kishte ardhur për të vendosur drejtësi sociale, dhe as për të ndëshkuar paligjshmërinë, as për t’u kthyer qyetarëve pasuritë publike të vjedhura në “dritë të diellit”. E majta donte thjeshtë pushtetin dhe për këtë ishte e gatshme të “harronte” çdo “bëmë dhe gjëmë” të paraardhësve të saj.

Edi Rama dhe ekipi i tij kanë “harruar”, sepse ata kanë gjithnjë e më pak lidhje me realitetin. Kanë ndërtuar një botë virtuale ku mendojnë se janë më të mirët, më të bukurit, më të diturit dhe se me disa foto në rrjetet sociale do të mund të mbulojnë apo fshehin realitetin e dhimbshëm të përditshmërisë së familjeve shqiptare. Në fakt nuk e mbulojnë dot.

Edi Rama ka “harruar”, sepse të harrosh është kthyer në modë në qeverisjen e 25 vjetëve të fundit. Dhe kur harron mirë ta bëjnë. Madje më zi ta bëfshin!