Pena 7-metërshe me mbishkrimin “Kryesorja jetën ta jetosh pa e vrarë – Lum Lumi”, prej tre vjetësh ka mbetur në oborrin e ateliesë së skulptorit Luan Mulliqi. Iniciativa të cilën skulptori e kishte marrë për të nderuar veprimtarinë e poetit Ali Podrimja nuk është finalizuar as në këtë përvjetor.
Data 21 korrik, të martën, shënoi përvjetorin e tretë të vdekjes së mjeshtrit të vargut poetik, i cili vdiq në qytetin jugor të Francës, Lodève. Ky përvjetor ka kaluar në heshtje, pasi asnjë prej institucioneve nuk ka organizuar ndonjë aktivitet për ta kujtuar.
As ideja për vendosjen e skulpturës së realizuar nga Mulliqi me organizatën e artistëve “Vinart” në afërsi të bibliotekës kombëtare “Pjetër Bogdani” nuk është finalizuar.
