Shtetas nga Irani, Afganistani, Turqia dhe Gjeorgjia, janë deportuar të premten, 12 qershor, në Republikën e Afrikës Qendrore, si pjesë e një politike të re të “deportimeve në vende të treta” të administratës së Presidentit amerikan Donald Trump.
Sipas kësaj praktike, persona të deportuar, përfshirë edhe individë me mbrojtje ligjore, dërgohen në vende me të cilat nuk kanë lidhje, si pjesë e asaj që kritikët e konsiderojnë zgjerim të politikave të ashpra të emigracionit.
Trump e ka cilësuar Iranin si “regjim terrorist”, ndërkohë që SHBA-të po deportojnë shtetas iranianë që janë larguar nga vendi, përfshirë të paktën dy gra iraniane të përfshira në fluturimin e fundit. Sipas avokates së tyre, këta persona kishin marrë një mbrojtje ligjore që ua ndalonte dëbimin në vendet e tyre të origjinës, pasi gjykata kishte vlerësuar se atje mund të përballeshin me rrezik përndjekjeje ose rrezik serioz për jetën.
“Ne kemi frikë se ato do të detyrohen të kthehen në vendet nga të cilat janë arratisur“, tha avokatja Emily Trostle, duke shtuar se raste të ngjashme kanë ndodhur edhe më parë me deportime në Afrikë.
Avioni u nis nga Alexandria, Louisiana, të enjten në mbrëmje, sipas sistemit ICE Flight Monitor, i lidhur me organizatën Human Rights First. Më pas ai ka bërë një ndalesë në Ganë, e cila përdoret shpesh si qendër tranziti për deportime, dhe më pas ka mbërritur në kryeqytetin Bangui.
Nuk është e qartë nëse disa persona janë zbritur në Ganë apo nëse të gjithë janë dërguar në Republikën e Afrikës Qendrore, sipas avokates së emigracionit Alma David. Autoritetet e emigracionit në Ganë nuk kanë reaguar ende. Sipas saj, të deportuarit përfshijnë persona me status mbrojtjeje nga vende të ndryshme si Irani, Afganistani, Turqia dhe Gjeorgjia.
Në vitet e fundit, situata e sigurisë në Republikën e Afrikës Qendrore është përmirësuar pjesërisht me ndihmën e misionit të OKB-së, por vendi mbetet ende i paqëndrueshëm dhe i përfshirë nga grupe të armatosura.
Si pjesë e kësaj politike, administrata Trump ka zgjeruar kategoritë e personave që mund të deportohen dhe destinacionet ku mund të dërgohen.
Sipas Washingtonit, ndalimi ligjor vlen vetëm për deportimin direkt në vendin e origjinës, ndërsa dërgimi në vende të treta lejohet edhe nëse më pas ata kthehen në vendet e tyre.
Avokatët dhe të deportuarit kanë raportuar kushte të vështira ndalimi në Ganë dhe ndalime të zgjatura në Eswatini, si dhe raste të tjera të abuzimeve të pretenduara.
Mbetet e paqartë se çfarë do të ndodhë me këta persona pas mbërritjes në Republikën e Afrikës Qendrore, pasi nuk ka marrëveshje të njohur publike mes Banguit dhe Washingtonit për këtë çështje.
Sipas ekspertëve lokalë, mungesa e transparencës nga autoritetet ka rritur shqetësimet për fatin e emigrantëve të deportuar në vend. Departamenti Amerikan i Shtetit deklaroi se mbetet i përkushtuar për të ndaluar emigracionin e paligjshëm dhe në masë, por nuk dha detaje për marrëveshjet specifike.
Ndërkohë, autoritetet e Republikës së Afrikës Qendrore nuk kanë dhënë ende asnjë koment zyrtar.
