Zyrtarë të Qeverisë së Kosovës, ministri për Komunitete e Kthim Dalibor Jevtiç dhe zëvendëskryeministri i vendit Branimir Stojanoviç, përfaqësuesi i Zyrës për Kosovën në Qeverinë e Serbisë, Zoran Bojoviç me qindra serbë kanë qëndruar dje në Mushtisht, Suharekë.
Ata, siç njofton radiokim, kanë marrë pjesë në një liturgji me rastin e festës së Shën Trinisë.
Serbët e shpërngulur kanë vizituar shtëpitë e veta në një mëhallë të këtij fshati.
Ministri për Komunitete kthim Dalibor Jevtiç ka premtuar në Mushtisht se pas më shumë se një muaji në këtë fshat do të vihet gur themeli për ndërtimin e shtëpive të para për serbët.
“Bashkë me Zyrën e Bashkimit Evropian, bashkë me komunën e Suharekës, bashkë me UNHCR-në, e kemi konfirmuar dhe kemi lejuar listën e dhjetë familjeve të para që do të duhej të ktheheshin këtu.
I kemi siguruar mjetet, ne do t’ua ndërtojmë e rindërtojmë shtëpitë dhe ky do të jetë hapi i parë në procesin e kthimit”, ka thënë Jevtiç, transmeton Koha.net. Pos shtëpive, ministri ka paralajmëruar edhe rindërtimin e kishës në Mushtisht.
“Me përkrahje dhe koordinim të plotë me Argjipeshkvinë e Rashkë – Prizrenit duam që këtu të dërgojmë mesazhin e qartë se nuk kemi hequr dorë, edhe pse kanë kaluar 17 vjet, nga këmbëngulja m për të rindërtuar manastirin dhe se ndërtimi e rindërtimi i shtëpive nuk do të ndalet”, ka thënë Jevtiç. (b.an)
