Kryetari i zgjedhur i Akademisë së Shkencave, Skënder Gjinushi, ka sqaruar pozicionin e tij, pas akuzave se ka shkelur ligjin duke mbajtur njëherazi edhe postin e kryetarit të Partisë Socialdemokrate edhe atë të kryetarit të Akademisë së Shkencave.
Në një deklaratë për mediat, Gjinushi tha se nuk e ushtron më funksionin e anëtarit të PSD që prej 18 majit, ndërsa është zgjedhur nga asambleja e Akademisë si kryetar më 24 maj, ç’ka, shton Gjinushi, nuk është bërë ende efektive.
“Prej 18 majit unë nuk ushtroj më funksionin e kryetarit të PSD. Në 24 maj jam zgjedhur nga asambleja e nderuar e Akademisë së Shkencave si kryetar i Akademisë Shkencave çka ende nuk është bërë efektive. Kështu që ndryshe nga ç’rendin prej kohësh të thonë nuk kryej as funksionin e kryetarit të PSD e as kryetarit të ASH.
Veprimet e mësipërme janë çuar për regjistrim në gjykatë dhe në KQZ. Dje gjykata pranoi dorëheqjen dhe zëvendësimin. Gjykata nuk bën pranim a mospranim, por reflekton dhe KQZ ka ndërmarrë veprimet përkatëse. Kështu që nga dje nuk figuroj as formalisht as në aktet e gjykatës as KQZ. Ata që ngatërrojnë se datëlindja është ditë që fëmija merr frymë për herë të parë i pavarur dhe jo dita e regjistrimit në gjendje civile”, deklaroi Gjinushi.
g.kosovari
