Për serbët problemet shtrihen tashmë dhe dikund tjetër. Kryetari i Këshillit Kombëtar Boshnjak Sulejman Ugljanin ka deklaruar në Novi Pazar se boshnjakët tri herë në shekullin 20 –të janë deklaruar për formimin e autonomisë në këtë rajon, porse gjithmonë kanë mbetur duarthatë.
Ai, në ceremoninë me rastin e “Dana samoopredeljenja”Dita e Vetëvendosjes , ka thënë se Këshilli i Myslimanëve në Sanxhak, kryetar i të cilit ka qenë, më 25 tetor 1991 ka mbajtur referendum për autonominë e Sanxhakut. “Në atë referendum kemi vënë themelin e fortë në të cilin të rinjtë duhet ta ndërtojnë stabilitetin dhe autonominë territoriale ku boshnjakët do të jetojnë të lumtur e të pa shkelur nga askush. Për këtë arsye, fëmijët tanë, keni të drejtë dhe dokumente në bazë të të cilëve keni të drejtë në shtet. Bëjeni dhe ne do t’ju ndihmojmë”, ka thënë Ugljanin, raporton portali serb N1, transmeton Koha.net.
