Koncert protestë në Valbonë më 29 tetor e në Tiranë më 30 tetor, kundër HEC dhe ligjit të plehrave! Kjo është nisma e dy këngëtareve të njohura të skenës shqiptare dhe ndërkombëtare: Eda Zari dhe Elina Duni. Me një karrierë të suksesshme në Europë e më gjerë, artiste që kanë shkëlqyer në skena e ekrane të Perëndimit, dy këngëtaret kanë vendosur të rikthehen në atdhe për një kauzë që e konsiderojnë të drejtë: Në mbrojtje të TOKËS, të UJIT, të AJRIT, të JETËS! Ndërsa kanë interpretuar këngët më të njohura shqiptare të ripunuara përgjatë karrierës së tyre, këtë herë, ato i bëjnë thirrje t’u bashkohen nismës së tyre të gjithë artistëve e më gjerë, këngë si protestë dhe këngë si ndërgjegjësim për natyrën.
“Sportistët e kombëtares janë të mirëpritur, kori i operës dhe baleti, Teatri Kombëtar, Liceu Artistik “Jordan Misja”, Akademia e Arteve Tiranë dhe Prishtinë, regjisorët, artet pamore, super staret e popit jashtë e brenda atdheut… Nëse nuk mundeni të vini dërgoni një video mesazh pak sekonda, më moton: Në kundërshtim të ndërtimit të HEC-eve në lumin e Valbonës; Në kundërshtim të ligjit për importin e plehrave; Në mbrojtje të TOKËS, të UJIT, të AJRIT, të JETËS! (ose si t’ju pëlqejë) me dashni dhe besë”, thotë Eda Zari. Më herët, Zari e ka konsideruar ndërtimin e HEC në Valbonë të tmerrshëm.
“Kjo është e tmerrshme, kjo është dhimbje, kjo është padrejtësi haptazi ndaj natyrës, ndaj gjithçkaje që frymon. O njerëz, kjo mund të na ndodh nesër secilit prej nesh. Po nuk mund të rrihet këmbëkryq, nuk bëhet më sehir!”. Të dyja të rritura në familje artistësh, e të angazhuara me koncertet e shumta anë e kënd, ato kanë lënë angazhimet personale për t’iu kushtuar një kauze. Kujtojmë se Zari në ketë fillim tetor nxjerr albumin e saj të ri kushtuar Fan Nolit, ndërsa Duni, vijon koncertet. Vetëm pak ditë më parë media raportoi për suksesin e saj në Gjenevë.
MESAZHET E ARTISTEVE DHE FTESA
EDA ZARI
Flashbomb!!! Maratonë artistike. Në kundërshtim të ndërtimit të HEC-eve në lumin e Valbonës; Në kundërshtim të ligjit për importin e plehrave; Në mbrojtje të TOKËS, të UJIT, të AJRIT, të JETËS! Elina Duni dhe Eda Zari pranojnë të këndojnë kundër vendimeve te padrejta e jo të qurravitemi! Drejtuar: të gjithë artistëve shqiptarë e të huaj, që dashurojnë Shqipërinë, natyrën e saj mrekullore, e cila sot vuan nga pakujdesia dhe papërgjegjshmëria, por që kërcënohet edhe më shumë nga arbitrariteti dhe dritëshkurtësia e politikës. Të gjithë atyre individëve që duan të jetojnë dhe të rrisin fëmijët e tyre në Shqipëri, me TOKË, UJË, AJËR dhe JETË të pastër, pa plehra, pa ndotje; Kush i bashkohet në formën më urgjente dhe qytetare kësaj iniciative të pavarur civile?
ELINA DUNI
Kam vite që këndoj nëpër Evropë këngët e bjeshkëve, këngët e kodrinave, maleve, detit. Në folkun shqiptar natyra është personazhi kryesor. Në çdo këngë ndjehet fryma e saj. Shpesh mbyll sytë dhe nga skena ku jam, paramendoj ato fusha, male, dallgë e re që kanë qenë ndoshta të parët dëgjues të këngës që unë po këndoj. Dua të ëndërroj një Shqipëri ku patriotizmi është simbol i respektit së natyrës se mrekullueshme që kemi, ku ka një turizëm të ndërgjegjshëm, ku dashuria për vendin na bën më të mirë.
Dua të ëndërroj një Shqipëri ku liria nuk përfaqëson mosrespektim të pronës publike. Dua që të duam atë që na bashkon dhe sot të bashkohemi për të vetmen tokë qe kemi. Eda Zari dhe Elina Duni i bëjnë thirrje gjithë artistëve në Shqipëri dhe jashtë saj t’i bashkohen kësaj iniciative të pavarur civile. Në kundërshtim të ndërtimit të HEC-eve në lumin e Valbonës; Në kundërshtim të ligjit për importin e plehrave; Në mbrojtje të TOKËS, të UJIT, të AJRIT, të JETËS!
