Ka qenë bashkëshortja e 47-vjeçarit, Mark Kodra, ajo që ka rrëfyer momentin e konflikit të bashkëshortit të saj me shtetasin Emiljano Ndou, i cili mbeti i vdekur të premten në darkë në fshatin Bardhaj të Shkodrës.
Ajo tregon për mediat se një javë para ngjarjes, 25-vjeçari ka ardhur me një motor duke ecur me shpejtësi të madhe dhe duke xhiruar gomat para shtëpisë së tyre.
Në atë moment, tregon Kodra, ka qenë djali i saj ai që ka dalë, duke i thënë 25-vjeçarit të ecë më me kujdes, pasi kjo është shtëpia e tij.
Por siç duket, 25-vjeçari e ka marrë si ofezë daljen e djalit të saj, duke i thënë më tej: se ai bën çfarë të dojë dhe ecën si të ketë dëshirë.
“Fillimisht ka ardhur rretherrotull duke xhiruar gomat e motorit afër shtëpisë. Ai ka qenë një djalë i lëvizur shumë, por se ka pasur diçka me vajzat absolutisht jo. Ai ka një shok këtu, komshi i joni. Ka ardhur me motor pranë shtëpisë, por në atë moment ka dalë djali dhe i ka thënë ec më ngadalë. Ai i është kthyer djalit duke i thënë se eci sa të dua dhe ku të dua. Sikur ai të jetë një trim i madh”, u shpreh ajo.
Më pas, gruaja rrëfen se pasi doli ajo, ata u ndanë.
Sipas saj, ditën e djeshme, 25-vjeçari është rikthyer përsëri dhe i ka thënë djalit se çfarë kishe atë natë, duke shtuar se djali i saj i është përgjigjur se ajo natë kaloi dhe tashmë nuk kishte më asgjë mes tyre.
“Mbrëmë ka ardhur dhe i ka thënë djalit se çfarë ke pas atë natë. Djali i ka thënë se u krye ajo punë, a u morëm vesh bashkë. Pastaj, si për të mos mjaftuar kjo, e ka sharë djalin me gjithë robt dhe ka qëlluar ndaj tij”, tha ajo.
Pas këtij episodi, tha gruaja, djali ka hyrë brenda dhe ka folur me të vëllanë që ka në Francë, por pikërisht gjatë këtij momenti e ka dëgjuar e motra, e cila e ka rrëfyer ngjarjen tek e ajo.
“Ka hyrë Brenda pastaj djali dhe ka fol me të vëllain që ka në Francë, në këtë moment e ka ndjerë vajza. Pastaj vajza pasi ka dëgjuar bisedën ka ardhur dhe më ka thënë se është kapur Valentini me dikë. E pyeta djalin se më ke je ngatërruar më tha se jam ngatërruar me dikë. E pyeta po si ishte puna, më tha më ka sharë dhe më ka gjuajtur. Më tha se këtë punë e mbylli unë dhe doli e iku, pastaj se kam parë më”, tregoi gruaja.
Ajo theksoi se bashkëshortit i takoi krejt rastësisht të bisedonte me të rreth konfliktit, pasi ata u takuan në një lokal të fshatit.
Mirëpo, sipas saj, 25-vjeçari ka vepruar në të njëjtën mënyrë, duke sharë dhe qëlluar 47-vjeçarin.
“Burrit i ra me u marrë vesh me këtë 25-vjeçarin, por ai ka sharë edhe burrin, duke bërë të njëjtën sjellje. Burri është takuar me të tek lokali dhe se ka telefonuar. Pas pak erdhi burri dhe hyri brenda. Nuk ka bërë as 15 minuta erdhi viktima dhe solli shokun e tij prapë, këtë komshinë. Motori i tij dëgjohej prej qendrës. Ka dalë, e ka lënë armën aty dhe e ka pritur kur të kthehej. Kam dalë përpara me i ul armën dhe më ka shtyrë mua. Ai ka xhiruar gomën këtu dhe ka nxjerr tym. Kot pa lidhje ka qenë, se ne kemi qenë miq. Ka qenë mush për dikë dhe ka mbet tek na. Burri doli për ta ndalur, por nuk e ndali dot. Ndaloi vetë këtu, i ka rënë gomës së pasme dhe ka nxjerr tym, atëherë burri e ka qëlluar.
Ka pas dhe një konflikt para një viti, i ka rënë dhe atëherë burrit tim. E ka lënë burri im atë punë. Mbrëmë ka qenë mbush komplet”, tha ajo.
Ngjarja në Shkodër
Një 25-vjeçar është vrarë me armë zjarri rreth mesnatës në Shkodër. Viktima është Emiljan Ndou, banues në Bardhaj, i cili u qëllua me armë zjarri pranë një kalçetoje në këtë fshat.
Mësohet se i riu është konfliktuar me 47-vjeçarin vjecarin Mark Kodra për motive të dobëta dhe sherri ka degjeneruar në përdorimin e armës. Kodra e ka qëlluar me kallashnikov të riun, i cili nuk u mbijetoi plagëve të marra duke ndërruar menjëherë jetë.
Pak minuta pas ngjarjes, policia e Shkodrës arriti që të vinte në pranga autorin e vrasjes Mark Kodra ndërsa ka sekuestruar edhe armën me të cilën ai kreu krimin. Mësohet se viktima dhe autori ishin fqinj me njëri-tjetrin.
