Botërori 2026 po përballet me një sfidë të papritur që vjen vetëm pak javë para fillimit të turneut. Përveç tensioneve të vazhdueshme gjeopolitike mes Shteteve të Bashkuara dhe Iranit, që vënë në pikëpyetje pjesëmarrjen e këtij të fundit, një tjetër krizë ka ngritur shqetësim në nivel ndërkombëtar.
Në Republikën Demokratike të Kongos është shpërthyer një epidemi e virusit Ebola në pjesën lindore të vendit, e cila ka shkaktuar deri tani rreth 134 viktima dhe mbi 500 raste të dyshuara.
Situata është cilësuar alarmante nga drejtori i Organizatës Botërore të Shëndetësisë, Adhanom, i cili deklaron se “është shumë i shqetësuar për shtrirjen dhe shpejtësinë e epidemisë”, duke shtuar se aktualisht nuk ekziston ende një vaksinë ose trajtim i aprovuar për këtë variant të virusit.
Organizata Botërore e Shëndetësisë e ka shpallur situatën si një emergjencë shëndetësore me rëndësi ndërkombëtare.
Në përgjigje, autoritetet amerikane dhe Qendrat për Kontrollin dhe Parandalimin e Sëmundjeve kanë pezulluar përkohësisht hyrjen në SHBA për personat që kanë qëndruar në zonat e prekura.
Ndërkohë, FIFA po e monitoron nga afër situatën. Deri tani, pjesëmarrja e Republikës Demokratike të Kongos në Botëror nuk është në rrezik, dhe autoritetet kanë konfirmuar se ekipi po ndjek të gjitha udhëzimet shëndetësore dhe protokollet e sigurisë.
Sipas organizatorëve, skuadra pritet të mbërrijë sipas planit më 11 qershor, ndërsa lojtarët aktivë në Europë nuk pritet të kenë probleme.
Megjithatë, masa të rrepta testimi dhe izolimi mund të zbatohen për pjesë të delegacionit dhe udhëtarët nga zonat me rrezik.
