Policia ka dhënë njoftimin zyrtar lidhur me vrasjen pasditen e sotme në Vaun e Dejës. Sipas autoriteteve, viktima 40-vjeçare, Xhuliana Topalli është ish-partnerja e autorit, Niko Hila, 50 vjeç, duke lënë të kuptohet se dyshja i kishin dhënë fund marrëdhënies së tyre.
Megjithatë rrethanat e krimit të rëndë nuk janë zbardhur ende. Vetë Hila ndodhet në spital ku po merr ndihmën e nevojshme mjekësore, pasi ka tentuar të vrasë edhe veten.
Detaje
Xhuliana Topalli, 40-vjeçarja e cila u ekzekutua me kallashnikov nga ish-partneri i saj Niko Hila, prej kohësh ishte larguar në shtëpinë e prindërve të saj.
Mësohet se pas debateve të forta me Hilën, gruaja kishte vendosur t’i jepte fund marrëdhënies me 50-vjeçarin dhe ishte rikthyer tek prindërit.
Hila e qëlloi me breshëri kallshnikovi Topallin, duke e lënë të vdekur në vend. Më pas, ai ka qëlluar edhe veten duke tentuar vetëvrasjen, por ndodhet në spital duke u trajtuar.
Njoftimi i policisë
Më datë 09.01.2022, rreth orës 16:44, në fshatin Nenshat, Bashkia Vau i Dejës, në rrethana ende të paqarta shtetasi N. H., rreth 50 vjeç, dyshohet se ka vrarë me armë zjarri ish bashkëjetuesen e tij, shtetasen Gj. T., 40 vjeçe.
Shtetasi N.H pas krimit dyshohet se ka tentuar të vrasë veten dhe për pasojë ka mbetur i plagosur dhe ndodhet nën kujdesin e mjekëve në Spitalin Rajonal Shkodër. Grupi hetimor po vijon punën për sqarimin e rrethanave dhe zbardhjen e ngjarjes.
/a.r
