Avokati Ermal Ahmataj ka zbuluar detaje tronditëse nga krimi makabër në Fier, ku 8-vjeçari Mateo Vasia u rrëmbye paraditen e djeshme dhe u gjet në mbrëmje i vrarë dhe i groposur nga fqinji i tij.
Ahmataj tha në emisionin “Me zemër të hapur” se fëmija kishte dalë nga shtëpia pak para orës 10 të paradites për të blerë bukë. Ndërsa për autorin tha se është i aftë mendërisht sepse dilte dhe pyeste familjarët nëse e gjetën fëmijën ndërkohë që e kishte groposur.
“Nuk është i paaftë mendërisht, duhet të dënohet si person i përgjegjshëm para ligjit. Ai nuk është i paaftë mendërisht. Kallëzimi nga prindërit është bërë në orën 15:30. Djali ka dalë nga shtëpia pak para orës 10 dhe ka qenë i vdekur në orën 10. Brenda 30 minutash ka mbaruar gjithçka. Autori e ka qëlluar me kazmë pas koke, e ka lidhur fëmijën dhe fëmija është gjetur i groposur me duar të lidhura mbrapa”, tha avokati.
Ai tregoi më tej se familja e autorit dhe e viktimës kanë pasur një konflikt të mëhershëm i cili është harruar në paqe. “Njiheshin që në 2005 familjet. Në orën 10:00 e kishte groposur fëmijën dhe në orën 14:00 dilte tek dera dhe pyeste të ëmën dhe të atin ‘a e gjetët Mateon’. Djali është gjetur me duart e lidhura pas, i baltosur që ne kemi dhe zakonte, nuk baltoset trupi. Ishte groposur pranë banjës, që mbajnë në fshat”, tha avokati Ahmetaj.
/b.h
