Vjedhjet në urbanet e Tiranës (dhe jo vetëm) janë bërë mjaft të shpeshta e tani duket se askujt nuk i bën më përshtypje, por s’ka qenë kështu për këtë vajzë që shikoni në video, e cila është bërë pre e një vjedhjeje në urbanin e “Unazës”.
Sapo ka konstatuar që dokumente të ndryshme dhe një shumë e konsiderueshme parash i mungonin në çantë, vajza ka telefonuar policinë dhe ka detyruar shoferin e autobusit të ndalojë në moment.
Ngjarja ka ndodhur pranë me kinema “Agimin”. Policia ka detyruar shoferin të mbyllë dyert, në mënyrë që askush të mos ketë mundësinë të ikë dhe pasi është sqaruar me vajzën, i ka detyruar të gjithë pasagjerët të kalojnë një më një tek ajo për kontroll.
Videoja tregon momentin e sikletshëm për të gjithë udhëtarët, disa prej të cilëve edhe janë revoltuar. Edhe pse një situatë aspak e këndshme si për vajzën e si për pasagjerët, përfundimi ishte edhe më trishtues për të renë, pasi ajo nuk ka arritur të gjejë sendet e vjedhura./joq/a.k
