Nga Bashkim Kopliku
Të trishton e të revolton fakti sesi disa nga profesionistët tanë më të lartë, për tërmetet, dolën disa këto ditë, me mashtrime tip:
“tërmeti në Itali dhe Shqipëri kanë qenë njësoj të fortë, bile ai në Itali më i dobët se në Shqipëri, por dëmet në Itali, kanë qenë shumë më të mëdha.”. Bëhet fjalë për tërmetin në Aquilla, Itali, ku para 10 vjetësh vdiqën mbi 300 vetë, e ku u shkatërruan ndërtesa pa fund (shihni p.sh. në linkun: https://it.wikipedia.org/wiki/Terremoto_dell%27Aquila_del_2009.
Specialistët, për të mbështetur këtë mashtrim, japin të dhëna tip, “magnituda e tërmetit në Itali, ka qenë 5.9 gradë Richter, kurse në Shqipëri 6 gradë Richter, se ky ndryshim 0,1 gradë, si energji e tërmetit, është një ndryshim shumë i madh, me fish, gjë që e bën edhe më të fortë tërmetin tonë etj. etj. tam tame.
E vërteta është krejt tjetër soj: në Itali, intensiteti i tërmetit ka qenë shumë më i fortë se në Shqipëri! Në Itali ka qenë me intensitet të gradës X Merkali (apo 10 ballë), kurse ai në Shqipëri ishte vetëm me intensitet VI deri VII të shkallës Merkali (apo 6 deri 7 ballë), pa folur për koheezgjatjen. Kaq do të mjaftonte të thuhet, dhe normalisht nuk do të kishte fare vend për ato mburrje pavend, për gjoja sigurinë e lartë të ndërtimeve tona, e të tjera fryrje si gjeli maje plehut.
Nuk po del asnjë specialist tërmetesh, t’u thotë, “boll o mashtrues, se na turpëruat, si shqiptarë!”.
Postimin tim të para disa ditëve, për kuptimin e magnitudës dhe intensitetit të tërmeteve, e kisha destinuar jo për specialistë të tërmeteve, por për ju miq, për ne, që nuk kemi zanat primar tërmetet. Pooor, që këto gjëra, mos t’i kenë të qarta specialistët “më të mirë të Shqipërisë”, nuk ka asnjë mundësi!
Me që specialistët nuk po reagojnë, le të reagojmë ne jospecialistë, të mos bëhemi bashkëfajtorë në mashtrim, duke heshtur.
