Votimi i sotëm i Senatit amerikan për të mos miratuar propozimin e Presidentit Joe Biden për ambasador në Shqipëri, nuk ka qenë aspak qëndrim politik. Por thjeshtë një procedurë parlamentare, e cila shumë shpejt pritet të rikthehet në komisionin e Jashtëm të Senatit, e do të miratohet. Nuk ka pasur asnjë argument apo kontestim nga republikanët apo demokratët në Senatin e SHBA.
Siç thuhet në njoftim, kandidatura i është kthyer shefit të Shtëpisë së Bardhë, sipas një procedure që parashikon që kandidatura të riparaqitet nga Presidenti Biden, për shkak të tejkalimeve të afateve kohore.
David J. Kostelancik, doli përpara Komisionit për Marrëdhëniet me Jashtë në Senatin amerikan në mars të vitit të shkuar, ku foli për prioritetet e tij gjatë misionit që pritet t’ i besohet.
Një nga sektorët e bashkëpunimit të ngushtë mes dy vendeve, sipas diplomatit të karrierë, do të jetë forcimi i mëtejshëm i partneritetit në mbrojtje.
Rikthimi në Shqipëri
Kostelancik ka shërbyer edhe më herët në ambasadën amerikane në Shqipëri në fillim të viteve ’90, në zyrën politike. Ai ka punuar edhe si zëvendës Shef i Misionit dhe për dy vjet, si i Ngarkuar me Punë i përkohshëm në ambasadën e SHBA-së në Budapest të Hungarisë.
David J. Kostelancik ka mbajtur gjithashtu pozicionet e Drejtorit të Zyrës për Çështjet e Evropës Jugore Qendrore dhe Drejtorit të Zyrës për Çështjet Ruse, në Byronë për Çështjet e Evropës dhe Euroazisë si dhe të Drejtorit të Zyrës së Evropës dhe Azisë në Byronë Ndërkombëtare për Çështjet e Narkotikëve dhe Zbatmit të Ligjit.
Kostelancik ka shërbyer dy herë në Ambasadën amerikane në Moskë si dhe në misionet e SHBA në OSBE dhe NATO.
I lindur në Ilinois, Kostelancik është diplomuar në Universitetin NorthËestern të këtij shteti. Ai ka dy diploma master nga Kolegji Kombëtar i Luftës dhe Universiteti i Miçiganit.
/f.s
