Të mërkurën, më 23 gusht 2023, lajmi për vdekjen e kreut të grupit privat paraushtarak rus Wagner, Yevgeny Prigozhin dhe bashkëpunëtorëve të tij më të afërt pas rrëzimit të aeroplanit me të cilin po udhëtonin, u përhap në mbarë botën.
Autoritetet ruse dhe vetë Grupi Wagner e kanë konfirmuar këtë, megjithëse rezultatet e procesit zyrtar të identifikimit do të zgjasin disa ditë.
Avioni u rrëzua në rajonin Tver, jo shumë larg Moskës, në një fluturim për në Shën Petersburg, dhe në bord ishin dy nga bashkëpunëtorët më të rëndësishëm të Prigozhinit, zëvendësi për operacionet ushtarake Dmitry Utkin dhe zëvendësi për logjistikën dhe operacionet civile, Valery Chekalov.
Kjo ngjarje do të ketë padyshim pasoja shumëdimensionale, nga të brendshme në të jashtme, përveç atyre që kanë të bëjnë me konfliktin në Ukrainë, sepse një nga figurat më të forta simbolike të këtij konflikti, pothuajse i vetmi që mund të krahasohej me aktorët më të rëndësishëm politikë të tij në publiku botëror është zhdukur. Ndërkohë, i ndjeri tashmë Prigozhin ka lënë pas të venë e tij të pangushëllueshme, Ljubova Prigozhin.
Kush është Ljubova Prigozhin?
Ajo ka lindur më 26 qershor 1970. Është një biznesmene dhe farmaciste ruse. Shquarja e saj i atribuohet kryesisht lidhjes me burrin e saj. Ajo është pronare e një zinxhiri butiqesh të njohur si Muzeu i Çokollatës, që ndodhet në Shën Petersburg. Ajo mbaroi shkollën e mesme në Rusi dhe më pas vazhdoi studimet e larta për mjekësi, duke u diplomuar për farmaci.
Për më tepër, ajo është pronare e një qendre Wellness të vendosur në rajonin e Leningradit. Pronësia e saj shtrihet edhe në një hotel butik të quajtur Cristal Spa & Residence, i cili mori çmimin prestigjioz Perfect Spa Project Award në 2013. Ajo zotëron gjithashtu Agat LLC, një degë e Concord Management and Consulting LLC. Kompania e fundit është pjesë e grupit Concord, raporton The Statesman.
Në fillim të konfliktit në Ukrainë, vendet perëndimore vendosën sanksione financiare ndaj Ljubova Prigozhin për shkak të përfitimeve që burri i saj mori nga kontratat publike me Ministrinë ruse të Mbrojtjes gjatë aneksimit të Krimesë dhe pushtimit separatist pro-rus të Ukrainës lindore.
Pavarësisht futjes së sanksioneve, Ljubova Prigozhin vazhdoi t’i ofronte mbështetje të konsiderueshme bashkëshortit të saj. Duke punuar në mënyrë diskrete, ajo ka ndikim të konsiderueshëm dhe zë një pozicion qendror në menaxhimin e operacioneve të Wagner Group. Por ka informacion të kufizuar publik në lidhje me Ljubova Prigozhin. Ajo zgjedh qëllimisht të mbajë një profil të ulët dhe të shmangë tërheqjen e vëmendjes.
Pasuria e Ljubovës, njëherësh e të dyve si çift, vlerësohet normalisht në një miliard euro.
Fëmijët e tyre
Në vitin 2019, vajza e madhe Polina ishte aksionere në kompaninë ruse Lahta Plaza, e cila në mars 2022 ra nën sanksionet e SHBA. Tani është nën kontrollin e djalit të Prigozhinit, Pavel. Lahta plaza, sipas dokumenteve të korporatës, ndau një auditor dhe një numër telefoni me kompanitë ruse që furnizonin pajisje të rënda industriale për kompanitë e minierave dhe pyjeve në Afrikë, të cilat më vonë u sanksionuan nga SHBA dhe BE si një front për Wagner.
Polina është fëmija i parë i Prigozhinit. Ajo ka lindur në vitin 1992, ndërsa djali Pavel ka lindur në vitin 1996 ose 1998. Vajza e vogël Veronika ka lindur në 2005.
Yevgeny Prigozhin njihej si një oligark rus, lider mercenar dhe më parë ka mbajtur një pozicion besimi të ngushtë me presidentin rus Vladimir Putin, derisa ai nisi një rebelim në qershor 2023.
Thuhet se avioni mori flakë në përplasje me tokën dhe më pas u dogj. Koha totale e fluturimit të tij ishte më pak se 30 minuta.
