Një polemikë e re ka përfshirë së fundmi Lamine Yamal, por këtë herë çështja nuk lidhet me paraqitjet e tij në fushën e futbollit.
Sulmuesi i Barcelonës dhe përfaqësueses së Spanjës u bë objekt thashethemesh se kishte tradhtuar të dashurën e tij, Inés García Santos.
Gjithçka nisi nga disa imazhe të publikuara në rrjetet sociale, për të cilat pretendohej se shfaqnin 19-vjeçarin gjatë pushimeve në Kolumbi. Në foto ai paraqitej në një jaht luksoz, pranë një vajze të veshur me bikini.
Imazhet u përhapën me shpejtësi në platformën X, duke nxitur menjëherë spekulime për një tradhti të mundshme nga Yamal. Megjithatë, më vonë u konstatua se fotot ishin gjeneruar përmes inteligjencës artificiale (AI), ndaj nuk përbënin dëshmi reale për pretendimet e ngritura.
Pas qarkullimit të materialeve të rreme, disa raportime pohuan se Inés e kishte hequr Yamal nga personat që ndiqte në Instagram dhe se lidhja mes tyre kishte marrë fund. Edhe kjo histori u hodh poshtë, pasi një pamje ekrani e publikuar më pas tregonte se García vazhdonte ta ndiqte futbollistin.
Një tjetër pretendim i shpërndarë në rrjetet sociale ishte se Inés kishte reaguar në TikTok për tradhtinë e Yamal, duke njoftuar përfundimin e marrëdhënies. Në këto postime thuhej gjithashtu se futbollisti e kishte tradhtuar në më shumë se një rast.
As këto deklarata nuk janë të vërteta. Inés García nuk ka bërë publikisht komente të tilla, as në profilet e saj sociale dhe as në ndonjë intervistë të njohur. Përkundrazi, ajo ka paralajmëruar publikun për ekzistencën e llogarive që shtiren si ajo dhe shpërndajnë informacione të pavërteta.
Gjatë Botërorit 2026, Inés është shfaqur si një nga përkrahëset kryesore të Yamal. Ajo është parë në stadium teksa ndiqte ndeshjet e Spanjës, e veshur me fanellën e tij me numrin 19.
