Diego Armando Maradona është bërë protagonist gjatë ditëve të fundit me paraqitjet e tij të çuditshme në stadium ku ai u shfaq në gjendje të rënduar dhe u desh asistenca e mjekëve që të merrte veten.
Por ajo që është më e rënda, dikush kishte shpërndarë lajmin se Maradona ishte ndarë nga jeta gjatë ndeshjes Argjentinë-Nigeri.
Lajmi qarkulloi për disa minuta në rrjetet sociale dhe familjarët e Maradonës u shqetësuan shumë dhe e telefonuan vazhdimisht legjendën argjentinase për të mësuar se çfarë po ndodhte.
Maradona i ka qetësuar të gjithë në telefonatat e tij, por është mërzitur kur ka mësuar se motra e tij kishte kaluar në gjendje të fikëti pas atij lajmi dhe sipas gazetës “Clarin”, ka udhëzuar avokatin e tij që të vendosë një shpërblim për këdo që e ndihmon për të gjetur se kush ka hapur këtë lajm të rremë, shkruan Vip Sport.
Avokati Matias Morla ka bërë të ditur se është vënë një shpërblim prej 9500 eurosh për atë që do të sjellë informacione të besueshme. “Dikush do të flasë, kur bëhet fjalë për para”, theksoi avokati.
Maradona pritet të kthehet në stadium për të parë ndeshjen e Argjentinës ndaj Francës por sipas mediave spanjolle, në kampin e përfaqësueses askush nuk e duron më.
Mesi me shokë do të dëshironin që Maradona të mos ishte më i pranishëm në ndeshjet e tyre, pasi e ka tepruar me sjelljet e tij duke marrë vëmendjen nga fusha e lojës dhe duke u bërë shpesh objekt shpërqendrimi.
a.ç
