Shtetasi i Kosovës, Ymer Shahini, i dyshuar për mashtrime të rënda financiare, është në kërkim nga drejtësia amerikane. Akuzat ndaj tij janë të jashtëzakonshme. Prokurori ka paraparë një dënim prej 65 viteve burg, si dhe rreth 6 milionë dollarë dënim në të holla
Shtetasi i Kosovës dhe i Kanadasë, Ymer Shahini, është në mesin e shtatë personave të akuzuar nga FBI-ja për përfitim të jashtëligjshëm dhe mashtrim në Distriktin Jugor, në Neë York. Ata akuzohen se ilegalisht kanë përfituar 20 milionë dollarë përmes mashtrimit.
Disa nga të akuzuarit janë arrestuar tashmë, ndërsa në arrati gjendet kosovari Ymer Shahini, i cili po kërkohet nga FBI-ja. Skema e këtij mashtrimi parashihte që fshehurazi të merreshin nën kontroll miliona aksione të kompanisë “Gerova Financial Group Ltd”, të cilat pastaj në mënyrë të fshehtë do të shiteshin, bën me dije media kosovare përmes “Gazeta Express”.
Në plan ishte që gjysma e këtyre aksioneve të kaloheshin në emrin e Ymer Shahinit.
Vëllezërit Galanis, të cilët janë të akuzuarit e tjerë nga FBI-ja për mashtrim dhe përfitim të jashtëligjshëm, janë përkujdesur për hapjen e llogarisë së Shahinit: “Shahini Accounts” dhe kaluan aty aksionet e shitura fshehurazi, në mënyrë që në “Gerova” të mos vihej re se kush ishte pronari i vërtetë i tyre dhe Jason Galanis të vazhdonte ta mbante nën kontroll kompaninë “Gerova”. Ymerit i ishte premtuar një kompensim i mirë për të vazhduar këtë mashtrim. Në këtë mënyrë Jason Galanis përfitoi përsëri miliona duke vazhduar ta kontrollonte tregun e shitjes së stoqeve të Gerova-s. Deri në fund të kësaj kurdisjeje ky grup përfitoi përmes mashtrimit 20 milionë dollarë.
Në anën tjetër, Ymer Shahini posedon biznes edhe në Kosovë. Ai është pronar i njërës nga kompanitë e licencuara nga ATK-ja për fiskalizim “Printec L.L.C”. Me këtë kompani, Shahini ka fiskalizuar një pjesë të bizneseve të Kosovës.
Kompania e Jason Galanis’it “Dorian & Pan Illyrian partnership L.L.C.” është regjistruar në Kosovë në vitin 2010.
Në aktakuzën e ngritur nga Prokuroria e Manhatanit, thuhet, në mes të tjerash, se ai duhet të dënohet, nëse gjendet fajtor, me një dënim të përgjithshëm prej 65 vjet burg dhe 6 milionë dollarë.
