Ilaria Sula, studentja 22-vjeçare shqiptare e La Sapienzas u masakrua në Itali nga i dashuri, Mark Antony Samson. Javën e fundit akti ekstrem bëri bujë përtej Adriatikut, ndërsa opinioni publik dënoi rastin.
Mirëpo në Itali një ngjarje tronditëse ndodhi në futbollin e moshave nën 17-vjeç, kur një trajner futbolli kërcënoi gjyqtaren 17-vjeçare të takimit duke u futur me forcë në dhomat e zhveshjes dhe i thënë se “duhet të përfundosh si Ilaria Sula, duhet të ishe vrarë kur ishe e vogël”.
Në pushimin mes pjesëve në Terni, gjatë ndeshjes mes Sangemini dhe Sporting Terni, trajneri Ernesto Galli i Sporting Terni u fut me forcë në dhomat e zhveshjes dhe kërcënoi gjyqtaren me tone të larta. “Duhet të ishe vrarë kur ishe e vogël. Duhet të përfundosh si Ilaria. Në këtë pikë nxirren thikat”, raportohet të jetë kërcënimi.
Për këtë arsye, gjyqtari sportiv ka pezulluar deri më 31 dhjetor 2028 Ernesto Gallin, trajnerin që ka kryer shkeljet, përveç gjobës me 500 euro për klubin.
Gjyqtarja më pas përjashtoi trajnerin për “fyerje shumë të rënda seksiste dhe kërcënime të ndryshme”, siç raportohet në njoftimin zyrtar për shtyp të Ligës Kombëtare Amatore. Pavarësisht përjashtimit, Galli nuk u largua nga fusha, duke e përkeqësuar situatën e tij.
“Gjatë pjesës së dytë, – vijon disiplina,- ai u kthye brenda fushës, por delegati i pranishëm u kujdes menjëherë që ta detyronte të dilte sërish jashtë. Pasi doli jashtë, Galli filloi të ofendonte sërish arbitren, duke përdorur fraza tallëse dhe duke simuluar lehjen e një qeni. Më në fund ai u drejtua nga prindërit e pranishëm, duke thënë se gjyqtarja kishte shkuar shumë larg duke i dhënë fund ekipit të tij”, thuhet në raport.
Ilaria Sula u vra nga i dashuri i saj më 26 mars, i cili më pas trupin e saj e futi në një valixhe dhe e hodhi në një zonë pyjore jashtë Romës. Trupi i studentes shqiptare u gjet pas një jave të mbushur me kërkime, me autorin që u arrestua menjëherë.
