Një 13-vjeçare nga fshati Junosh i Gjakovës, është përdhunuar për shtatë ditë me radhë, nga 31-vjeçari Egzon Krasniqi nga fshati Treboviq i Pejës. Mediat e Kosovës shkruajnë se e mitura ishte shpallur e zhdukur, pasi familja kishte denoncuar në polici largimin e saj nga shtëpia me një djalë 18 vite më të madh.
Sot, kur ka kaluar një javë nga zhdukja e saj, e mitura është gjetur bashkë me Krasniqin dhe 13-vjeçarja pritet t’i nënshtrohet një ekzaminimi mjekësor.
Burime nga Prokuroria e Kosovës kanë bërë me dije për mediat lokale se Krasniqi e kishte marrë të miturën pasditen e enjtes në dalje të fshatit me veturën e tipit “Ford Fiesta” dhe e kishte çuar në shtëpinë e tij. Në ditët e tjera, për të humbur gjurmët nga familjarët e të miturës dhe policia, Krasniqi kishte ndërruar vendqëndrim shumë herë.
Fillimisht ata kishin shkuar në shtëpinë e dhëndrrit të tij e më pas në një motel në Pejë. Gjatë gjithë kësaj kohe, 31-vjeçari e kishte detyruar vajzën 18 vjet më të vogël që të kryente marrëdhënie seksuale me të. Më pas të dy ishin kthyer sërish në shtëpinë e Egzon Krasniqit.
“Pas intervistimit të palëve, vepra penale nga “Person i zhdukur” është rikualifikuar në “Dhunim”. Hetimet janë duke u zhvilluar nga Sektori i Hetimeve Rajonale në Gjakovë, nën mbikëqyrje dhe bashkëpunim të afërt me prokurorin kompetent,”- ka deklaruar policia në lidhje me rastin./m.j
