Për herë të parë, shkencëtarët kanë zbuluar prova të pranisë së baktereve të fshehura brenda gurëve të veshkave të quajtur “jo-infektivë”.
Këto grumbuj të fortë kristalesh të vogla formohen nga kimikatet në urinë dhe mendohet se krijohen për shkak të mungesës së lëngjeve ose përqendrimit të lartë të mineraleve dhe kimikateve.
Një studim i udhëhequr nga studiuesit në Universitetin e Kalifornisë, Los Anxhelos (UCLA) ka zbuluar se gurët e veshkave me kalcium oksalat, lloji më i zakonshëm, janë të pasur me baktere.
Në fakt, këta gurë përmbajnë shtresa bakteresh si pjesë e strukturës së tyre të brendshme.
“Ky zbulim sfidon supozimin se këta gurë zhvillohen vetëm përmes proceseve kimike dhe fizike, dhe në vend të kësaj tregon se bakteret mund të qëndrojnë brenda gurëve dhe madje të kontribuojnë aktivisht në formimin e tyre”, shpjegon urologia Kymora Scotland nga UCLA.
“Duke zbuluar këtë mekanizëm të ri, studimi hap derën për strategji të reja terapeutike që synojnë mjedisin mikrobial të gurëve të veshkave”. Gjetjet sugjerojnë se në disa raste kur gurët e veshkave rikthehen vazhdimisht, mund të ketë një infeksion bakterial në veshkë, ureter ose fshikëz që kontribuon në përsëritje.
Nëse ky infeksion trajtohet, atëherë ndoshta mund të ketë më pak gurë në veshka në të ardhmen.
Duke përdorur mikroskop elektronik dhe fluorescent, studiuesit gjetën prova strukturore dhe kimike të baktereve në gurët e kalcium oksalatit të marrë nga pacientë. Kjo ishte e vërtetë edhe tek pjesëmarrësit pa infeksione të traktit urinar.
“Ne gjetëm një mekanizëm të ri të formimit të gurëve që mund të ndihmojë në shpjegimin pse këta gurë janë kaq të zakonshëm”, thotë Scotland.
“Këto rezultate mund të ndihmojnë gjithashtu në shpjegimin e lidhjeve midis infeksioneve të përsëritura të traktit urinar dhe formimit të përsëritur të gurëve të veshkave, si dhe të ofrojnë njohuri për trajtimet e mundshme të ardhshme për këto kushte”.
Më shumë se një në 11 persona do të vuajë nga gurët e veshkave gjatë jetës dhe mbi 70 për qind e rasteve i atribuohen gurëve të kalcium oksalatit. Nëse bakteret luajnë një rol të rëndësishëm në formimin e tyre, atëherë trajtimet dhe udhëzimet për gurët e veshkave mund të kenë nevojë të përditësohen.
